Суперлига. Эркинов, Лобанов, Норхонов ва Жалилов ёхуд 25-тур лауреатлари

Championat.asia тур баҳслари асосида тур лауреатларини аниқлади.

"Навбаҳор" клуби бу тур лигада қолиш учун курашаётган "Андижон" меҳмони бўлди ва 2:1 ҳисобида ғалабага эришди. Тўғри "Андижон" мусобақа жадвалида охирги ўринларда бормоқда, лекин шу куни Кумиков шогирдлари ютқазмаслик учун борларини беришди ва сўнгги дақиқагача ўйнашди. Водий дербисидаги ғалабадан кейин "бургутлар"нинг қуйи лигага тушиб кетиши ойдинлашди. "Навбаҳор" устози Виктор Жалилов championat.asia сайти талқинига кўра 25-турнинг энг яхши мураббийи деб топилди.

"Металлург" бу тур Бекободда "Турон"ни қабул қилди ва 1:0 ҳисобида ғалаба қозонди. Бекобод клуби дарвозабони шу куни бир қатор сейвлар билан жамоаси жонига оро кирди. Шу боис Championat.asia сайти талқинига кўра, 25-турнинг энг яхши дарвозабони Александр Лобанов бўлди.

Бу турда "Сўғдиёна" ҳужумчиси Шоҳруз Норхонов "Насаф" билан баҳсда ажойиб гол урди ва тур голи муаллифига айланди. 

"Пахтакор" ярим ҳимоячиси Ҳожимат Эркинов Тошкент дербисида "Локомотив" билан баҳсда фаол ўйнади ва хет-трикка эришди. Шу тариқа, Ҳожимат Эркинов championat.asia талқинига кўра 25-турнинг энг яхши футболчиси деб топилди.

Ўзбекистон чемпионати турнир жадвали >>>>> Суперлига