Сўнгги сонияларда тўп киритиб, "Бунёдкор" ғалабасини таъминлаган ярим ҳимоячи, жамоасига сафарда муҳим ғалаба олиб келган мураббий — Суперлигада 23-тур лауреатлари

"Championat.asia" ўтказилган баҳслар асосида тур лауреатларини аниқлади.

"Турон" аъзоси Раҳимжон Давронов "Championat.asia" сайти талқинига кўра 23-турнинг энг яхши дарвозабони деб топилди. 

Яйпанликлар дарвозабони ортда қолган турда ўзини кўрсатиб, дарвозаси дахлсизлигини сақлаб қолди, унинг жамоаси "Сўғдиёна"ни 1:0 ҳисобида енгишга эришди.

"Насаф" ярим ҳимоячиси Ойбек Бозоров "Championat.asia" талқинида 23-турнинг энг яхши футболчиси дея эълон қилинди.  

"Насаф" вакили "Навбаҳор"га қарши марказий беллашувда 85 дақиқа ҳаракат қилди ва жамоасининг муҳим ғалабасида катта ҳисса қўшди. У бир нечта вазиятларда дарвозани нишонга олиб, хавфли вазиятлар ҳосил қилди ва ўзига хос паслари билан бошқалардан ажралиб турди. 

"Бунёдкор" ярим ҳимоячиси Умид Султоновнинг сўнгги сонияларда "Нефтчи" дарвозасига киритган тўпи "Championat.asia" талқинига кўра 23-турнинг энг чиройли голи (ВИДЕО) деб тан олинди. 

"Қалдирғочлар" ҳужумкор ярим ҳимоячиси "Нефтчи" билан баҳсда жамоасининг қарши ҳужумини гол билан якунлай олди. Эътиборлиси, у 85-дақиқадан захирадан майдонга тушган ва гол урилган пайтда қўшиб берилган вақт тугаб бораётган эди.

ОКМК устози Миржалол Қосимов "Championat.asia" талқинига кўра 23-турнинг энг яхши мураббийи сифатида эътироф этилди.

Олмалиқликлар ушбу турда сафарда "Андижон" устидан муҳим ғалабага эришди (1:0). Жамоа устозининг баҳсга тўғри тактика танлагани ғалаба омили бўлиб хизмат қилди.