"Сўғдиёна" мураббийи: "Бу йилги мақсадимиз - Ўзбекистон Кубоги"

"Бугунги чиройли ва ишончли ғалаба билан мухлисларимизни ва раҳбариятни табриклайман. Бугунги ғалаба билан тўхтаб қолиш йўқ. Барчанинг меҳнати сингди. Бошкович икки ярим йилдан буён Жиззах футболини ривожлантириш учун меҳнат қилиб келмоқда. Ушбу меҳнатлар ўз мевасини беради деган умиддаман" - деди Улуғбек Боқиев.

- "Сўғдиёна"нинг бунчалик ишончли ғалабасининг сабаби нимада? "Навбаҳор" бугун сиз кутганингиздек ўйнай олмадими?

- Биз рақибнинг сўнгги икки учрашувини яхши ўрганиб чиққандик. Биринчи бўлимда ўхшамаган режаларимизни иккинчи бўлимда амалга оширдик. Танаффусдан сўнг рақибнин заиф жиҳатларига зарба бердик.

- Бугунги учрашувда мағлуб бўлган жамоанинг бош мураббийи истеъфога чиқарилиши мумкин деган хабарлар тарқалди. Устига-устак, Иван Бошкович бугун барча голларни ҳиссиётларга берилиб нишонлади. Ушбу гаплар қанчалик рост? Балки жамоа бугун мураббийни олиб қолиш учун шунчалик яхши ўйнагандир?

- Бундай гап-сўзлар ҳар доим бўлган. Биздан олдин ҳам ва биздан кейин ҳам. Жамоа натижалари яхши бўлмаса, журналистлар мураббий кетиши мумкин дея ёза бошлайди. Бу нормал ҳолат. Бизнинг бу йилги мақсадимиз - Ўзбекистон Кубоги. Мақсадимиз сари юришда давом этамиз. Саволингиз эса ўринсиз деб ўйлайман.

Бугунги ўйин принципиал эди. Ютган жамоа ярим финалга чиқарди. Бундай ўйинларда эмоцияларга берилмаслик қийин. Ушбу ҳиссиётларни футболчиларга етказиб беришга ҳаракат қилдик. Учинчи голга эътибор берсангиз, Шохрух Абдураҳманов рақиб дарвозабонига охиригача босим қилди ва якунда биз ҳисобни йириклаштирдик.

Иван Бошковичнинг бироз тоби йўқ. Ўйиндан кейин ўзини бироз ёмон ҳис қилгани учун, Бошковичнинг ўрнига мен матбуот анжуманида иштирок этаяпман.

- Люпчо Дориевнинг бугунги ўйинига баҳо бериб ўтсангиз. Дориев бугунги ўйини билан чемпионатимизнинг энг яхши футболчисига даъвогар эканлигини исботлаб қўйгандек.

- Дориевга голли вазиятларни яратиб бераётган жамоадошлари бор.

- Демак, сизнинг жамоа ҳужумлари фақат Дориевга боғланиб қолмаган, тўғрими?

- Ҳа. Бугун захирадан майдонга тушган футболчилар ҳам ўз таъсирини ўтказди.