Шуҳрат Раҳмонқулов: “Ёшларимиз чорак финалда Японияни ютишга хақли”

Бўлажак баҳс олдидан кўпчилик турлича фикрларни илгари сурмоқда. Хўш, ўз вақтида “Пахтакор” ёшлари жамоаси билан ишлаган ва бугунги кунда Чилонзор стадиони қошидаги “Болалар-ўсмирлар футбол мактаби”нинг раҳбари сифатида фаолият юритаётган собиқ футболчи Шуҳрат Раҳмонқуловнинг бу борада фикри қандай?
 
- Албатта Хитой давлатида бўлиб ўтаётган ёшлар ўртасида Осиё чемпионати ўйинларига бефарқ эмасман ва Ўзбекистон U-23 ёшлар терма жамоамизнинг ҳар бир учрашувини диққат ва шу билан бирга катта ҳаяжон остида кузатиб бормоқдаман. Ўйлайманки, ўйиндан ўйинга йигитларимизнинг харакатларида ўсиш кузатилмоқда. Гуруҳда биринчи ўйинда қайд этилган мағлубиятдан кейин футболчиларимиз ўзларига керакли хулосаларни чиқариб олган кўринади. Улардан энди чорак финалда ҳам фақат ва фақат ижобий натижа кутмоқдамиз.  

- Бемалол айтиш мумкинки, Японияга қарши баҳс осон кечмайди. Гарчи улар мусобақага 1997 йилдаги футболчилари билан борган бўлсада, ўз гуруҳида пешқадам бўлди. Ўзбекистон – Япония қарама-қаршилиги жуда қизиқарли бўлади. Менимча футболчиларимиз ўз имкониятларини тўлиқ ишга солиб, бор  кучи билан ўйнаса япониялик ёшларни бемалол мағлуб этиш мумкин. Насиб қилса якунда шундай ҳам бўлади. Равшан Ҳайдаров бошқарувидаги жамоага бу борада омад тилаймиз ва уларни онайи жаҳон қаршисидан бўлса ҳам чин кўнгилдан қўллаб-қувватлаймиз.  

- Ўзбекистон ёшлар терма жамоамизнинг ўз гуруҳида ўтказган учта ўйинидан келиб чиқиб, бирор бир футболчини аълоҳида ажратиб кўрсатмоқчи эмасман. Қишда ҳамма футболчи бир хил спорт формасида бўлади. Шунинг учун ҳозир футболчиларимиз деярли бир хил дейиш мумкин. Менимча Осиё чемпионатига энг муносиб номзодлар олиб кетилган – дейди Шуҳрат Раҳмонқулов.

Исломбек Рустамбеков.