Шавкат Саидов: "Дерби ҳар доимгидек қизиқарли ўтди"

Шавкат Саидов, “Металлург” ФК жамоа бошлиғи: - Тошкент вилояти жамоалари дербиси ҳар қачонгидек бу сафар ҳам қизиқарли ва муросасиз курашлар остида ўтиб, мухлисларга манзур бўлди. Ғузордаги мағлубиятдан кейин футболчиларнинг жисмоний ҳамда руҳий ҳолатини тиклаш борасида мураббийларимиз жиддий бош қотиришди. Ўйинга тайёргарликдан кўнгил тўлганди. Бироқ учрашув бошидаёқ гол ўтказиб юбориб, таъқибчига айланиб қолишимизни кутмагандик. Футболчиларимиз тайм ўрталарига келганда ўз ўйинларини намойиш эта бошлашди. Биринчи таймда биз натижадан қониқдик. Иккинчи таймда эса ўйинимиздан.

Бугун ўзининг иккинчи ёшлигини бошидан кечираётган Зоҳид Абдуллаев ёшларга ўрнак бўлди, деб айта оламан. Бежизга миллий терма жамоамиз мураббийлари назарига тушмаганлигини исботлади ва жуда муҳим голларга муаллифлик қилди. Бу ўйинда очко бизга ҳам, олмалиқликларга ҳам жуда зарур эди. Бизга уйимизда деворларимиз – мухлисларимизнинг қўллаб қувватлаши ёрдам берди ва мақсадимизга эришдик, дейди Шавкат Саидов.

"Металлург" матбуот хизмати