Сервер Жепаров: "Мухлисларга алоҳида раҳмат"

Осиё Кубогининг 1-туридан ўрин олган Ўзбекистон - КХДР учрашуви якунига етгач, микст-зона журналистлар билан тўлди. Мағлубиятга учрагани учунми ёки инглиз тилини билишмагани боисми, шимолий кореялик футболчиларнинг ҳеч бири интервью беришни хоҳламади. Бизникилардан эса фикр олиш қийин кечмади. Австралиялик журналистлар термамиз сардори Сервер Жепаров чиқиши биланоқ уни ўраб олишди. Биз эса уларга таржимон вазифасини ўтаб бердик.

- Ғалаба қозонганимиз билан ўйин осон кечди деб айтолмайман. Биз учун муҳими, биринчи бўлиб тўп киритиш эди ва буни уддаладик. Агар охирги дақиқада гол ўтказиб юборганимизда жуда алам қилган бўларди. Хайрият, уларнинг зарбаси голга айланмади.

- Ўзбекистон термаси ушбу мусобақада ўз олдига қандай мақсад қўйган?
- Энг асосий мақсадимиз - турнирда ғолиб чиқиш. Бунинг учун бор куч билан ҳаракат қиламиз.

- Агар Ўзбекистон гуруҳдан чиқса Австралияга тушиши мумкин. Маълумки, Қатардаги турнирда Австралия Ўзбекистонни 6:0 ҳисобида мағлуб этганди.
- Нима демоқчи эканлигингизни тушундим. Ўша ўйин бўлиб ўтганига анча бўлди ва энди уни унутиш керак. Агар Австралия билан яна бир бор курашадиган бўлсак, бу сафар бошқача ўйин кўрсатамиз ва ўша мағлубият аламини олишга ҳаракат қиламиз.

- Бугун ўзбекистонлик мухлислар сизларни ажойиб тарзда қўллаб туришди.
- Ўзим ҳам шу ҳақда гапирмоқчи бўлиб тургандим. Чиндан ҳам ишқибозларнинг қўллаши бизга яхшигина мадад берди. Мен уларга алоҳида раҳмат айтмоқчиман. Мухлислар олқишлаб турса, босқичма-босқич юқорига кўтарила оламиз.

Х.Холиқов.
Сидней шаҳридан