Сергей Юран: "Швейцария билан ўйинда Неймар Бразилиянинг энг ёмон футболчиси бўлди"

Хабарингиз бор, жаҳон чемпионати гуруҳ ўйинларининг илк турида Аргентина Исландия, Бразилия эса Швейцария билан 1:1 ўйнади. Кеча эса кутилмаганда Германия Мексикага 0:1 ҳисобида ютқазиб қўйди.

- Сиз учун Германия, Аргентина ва Бразилия иштирокидаги ўйинлар қанчалик кутилмаган бўлди?
- Жаҳон чемпионатини маза қилиб кўряпман ва мен учун бу мусобақада фаворит йўқ. Кулманг, ҳозирча энг яхши фаворит бу - Россия. Чунки бизникилар Саудияни  5:0 ҳисобида мағлуб этишди. Мен кучли жамоаларнинг жисмоний ҳолатдан тўғри фойдаланиб, ўйин тартибига қаттиқ амал қилишаётгани гувоҳи бўляпман. Бу жаҳон чемпионати исталган сюрпризни тақдим этиши мумкин. Лекин мен учун айтайлик, Германиянинг ютқазиб қўйгани сенсация бўлмади. Чунки Мексика жуда чиройли ўйин намойиш этди.

- Нима сабабдан Месси, Неймар каби юлдузлар ўзларини кўрсата олишмаяпти?
- Улар ҳам мундиалга тайёргарлик кўрган. Ҳали кўрасиз, юлдузлар ўзларини кўрсатади. Бу ҳозирча бошланиши ва ваҳимага ҳожат йўқ. Кўпчилик Бразилия Швейцария дарвозасига беш-олтита голни қалаштириб ташлайди деб ўйлаган бўлиши мумкин, лекин амалда бундай бўлмади. Ҳатто Франция ҳам қийналганини кўрдик.

Швейцария билан ўйинда Неймар бразилияликларнинг энг ёмон футболчиси бўлди. У кўп марта тўп йўқотди. ПСЖ ҳужумчиси ўйинни ўз қўлига олишга ҳаракат қилди, лекин футбол жамоавий спорт тури. Баъзан етакчилар ҳам ўз жамоаларининг ўйинига халақит беришяпти. Бунга эса Месси яққол мисол бўла олади.