Рустам Абдуллаев: “Йигитлардаги ғалабага бўлган иштиёқ мени хурсанд қилди”

- Ўйинни ўзинглар ҳам кўрдинглар, биринчи бўлимда вазиятлар реализацияси бўлмади. Озгина омадимиз келмади. Лекин яхши ютиб олдик. Битта нарсага хурсанд бўлдимки, йигитларда ғалабага бўлган иштиёқ юқори кўринди. Ўйинда ютишга интилиш бўлди. Учрашув муҳим эканлигини билиб ҳаракат қилишди – дея гап бошлади Абдуллаев.

- “Шўртан” ўйини ҳақида фикрингиз қандай?   
- Бу жамоа чемпионатни биринчи ўринда якунлашга яқин. Бизга енгиллик томони шу бўлдики, “Шўртан” муддатидан олдин элита йўлланмасини расмийлаштирди. Яхши жамоа эканлиги кўриниб турибди. Таркибида 3-4 нафар ўйинчиларнинг ҳаракатлари менга ёқди.

- Жамоангизни қолган 3та ўйинда битта дуранг ҳам олий лигага олиб чиқади...
- Ҳа. Лекин шунга қарамай биз барча ўйинларда ютиш учун майдонга чиқамиз. Чунки ютсак, мукофот пули оламиз. (Кулиб) Чемпионат тугагач деярли 4 ой давомида мукофот пулисиз ишлаймиз. Шунинг учун олдимиздаги 3та ўйинда ҳам ғалаба қозониб мукофот пулларини олишга ҳаракат қиламиз.   
- “Қўқон-1912”ни олий лигада ўйнашга тайёр деб ҳисоблайсизми ёки қандайдир муаммолар борми?
- Бу саволга жавоб беришга бироз эрта деб ўйлайман. Чемпионат тугаб бормоқда. Олдин мавсум поёнига етсин, кейин ҳаммасини ўйлаб кўрамиз. Лекин келаси йил ҳам муносиб иштирок этиш учун ҳаракат қиламиз.

- Иккинчи босқичда таркибга Дониёр Усмоновнинг келиб қўшилиши жамоани кучайтирди. Унинг келгуси  тақдири қандай кечади?   
- Билсанглар керак, бу ерга келишдан олдин “Локомотив”да ишлагандим. Шунда Усмоновнинг имкониятларини яхши билардим. “Қўқон-1912” бошқарувини қўлга олганимдан сўнг эса Дониёрни “Локомотив”дан мавсум охирига қадар ижарага олдик. Мана кўряпсизлар деярли барча ўйинда гол уриб келмоқда. Лекин уни келаси мавсум ҳам жамоамизда қолади деб айта олмайман. Унга ҳозирда 3-4та клуб қизиқиш билдирмоқда. Агарда “Локомотив” Усмоновни ўз сафига қайтариб олмаса, “Қўқон-1912”да олиб қоламиз. Бундан ўйинчини келаси йил ҳам жамоамда кўришни хоҳлайман.

Исломбек Рустамбеков.