Рўзиқул Бердиев ОКМК билан ўйиндан кейинги матбуот анжуманида айтган гаплари бўйича изоҳ берди (тўлиқ матбуот анжумани)

- Ўйин ҳақида фикрингиз?

- "Навбаҳор" бугун 5-4-1 схемасида ўйнаб яхши ҳимояланди. Рақиб режаси яхши ҳимояланиш бўлгани кўриниб турди. Позицион ҳужумларда вазият ярата олдик. Биринчи бўлимда гол уриб олганимизда ёки бўлмаса иккинчи таймда Чераннинг тепган тўпи дарвоза тўсинига тегмасдан гол бўлганида ишимиз анча енгиллашарди. Тўғри, уч очкони кўзлаб келгандик, лекин яхши ўйин ва бир очко учун ҳам шогирдларимга раҳмат айтаман. Дуранг қониқарли эмас, аммо кураш давом этяпти. Бу охири эмас.

- Бугунги баҳсда чемпионликка бўлган ҳаракат ва шашт майдондаги ўйинчиларда эмас, кўпроқ сизда кўринди. Бу ҳақда нима дея оласиз? Иккинчи саволим: ўтган тур ОКМК билан баҳсдан кейинги матбуот анжуманида баъзи гапларни гапирдингиз. Масалан, "Нефтчи" чемпионликни қўлга киритадиган бўлса, буни жамоа ортида турганлар амалга оширишини айтиб ўтдингиз. Бу гапни ҳаммаям айта олмайди. Сиз эса мард бўлиб гапирдингиз. Келинг, ҳаммасига шаффоф қараб шуни изоҳлаб берсангиз.

- Бу қийин нарса эмас. Биласиз, мен кўп ҳам сайтларни кузатмайман ва унчалик эътибор бермайман. Ўйлашимча, гапимни нотўғи тушуниб анча гапларни ёзишибди. Биринчи саволга келсак, бугунги ўйинда иштиёқ менда ҳам, футболчиларда ҳам бор эди. Ўзингиз кўряпсиз, ҳар тўрт кунда майдонга тушяпмиз. Бу жуда оғир. Бундай пайтда жамоани тайёрлаш қанчалик оғир эканини олдин ҳам айтиб ўтгандим.

Ҳозир Қаршига қайтиб дам олмасдан кейинги ўйин ҳақида ўйлашимизга тўғри келади. Қайси таркибни майдонга тушираман, бу ҳам масала. Чарчоқ ўз сўзини айтяпти. Агар тўлиқ тетик ҳолатда бўлганимизда янада зўр ўйин кўрсатган бўлардик. Лекин жамоамиздаги ҳаммада шашт бор, чемпионликни сақлаб қолишга ҳаракат бор.

 Иккинчи саволга келадиган бўлсак, бу ерда яширадиган нарса йўқ. Мен ҳар бир клубнинг меҳнатини қадрлайман. Шу жумладан, "Нефтчи"нинг ҳам. Нима демоқчи бўлганимни тушунтираман: "Нефтчи"ни ОКМКга қарши баҳсда 20 минг мухлис қўллаб турди. Кейин "Нефтчи" Ғузорга бориб "Шўртан" билан ўйнади ва у ерда мухлислари қўллаб турди. Сўнгра мухлислар Тошкентга келиб, у ердан Олмалиққа бориб бизга қарши мухлислик қилишди. Мана бугун ҳам 5 минг атрофида "Нефтчи" ишқибози ўйинга келди. Бу қаҳрамонлик эмасми?

Лекин одамлар айтган гапларимни фақат негатив томонга буришди. Мен мухлисларни қаҳрамон сифатида кўрсатмоқчи эдим. Мана бугун ҳам беш минг ишқибоз бизга қарши мухлислик қилди. Бу қаҳрамонлик эмасми? Бу ўз жамоасига ёрдам эмасми? Раҳбариятнинг шунча шароит яратиб бераётгани қаҳрамонлик эмасми? Нима учундир ҳамма негатив томонини қидириб кетди.

Эртага ким чемпион бўлса ҳам меҳнатини қадрлаймиз. Чунки чемпионлик ўз-ўзидан рўй бериб қолмайди. Афсуски, ҳеч ким масалага бу томондан ёндашмаяпти. Мухлисларни назарда тутгандир деб ҳеч ким яхши томонига қарамади. Тасаввур қилинг, ОКМК билан ўйинда икки мингга яқин "Нефтчи" мухлиси бизга қарши мухлислик қилди. Биз эса уларни муҳокама қилиб ўтирдик. Кечирасиз-у, менинг гапларимда ортиқча ҳеч нарса йўқ эди, фақат нотўғри тушуниб пашшадан фил ясашди.

- Биламизки, "Насаф" бу йил ҳам чемпионликка курашяпти. Ўтган йил жамоа ўз тарихида биринчи бор чемпион бўлганди. Ўтган йил чемпионлик йўлидаги ҳаракат билан бу йилги чемпионликни сақлаб қолиш ўртасида қандай фарқ бор? Бу босим юкламаяптими?

- Ўтган йил бошқалардан ҳар жабҳадада устун эдик деб ўйлайман. Шунинг учун уч-тўрт тур қолганида чемпионликни нишонлагандик. Бу йил эса курашадиган жамоалар кўпайди. Қолаверса ўртамиёна клубларнинг ҳам ўйини кучайди. Улар ҳам очко ола бошлашди. Масалан, бугун "Навбаҳор" анча жиддий курашди.

- Рақамларга эътибор берсак, "Насаф"да ҳар йил охирига келиб натижа пасайиб қоляпти. Бу "анъана"га айланиб қолмадими?

- Охирги икки йилни оладиган бўлсак, чиндан ҳам охирги турларни барқарор ўтказа олмадик. Ўтган йил ҳам чемпион бўлганимиздан сўнг қолган баҳсларда ўйинимиз чиқмади. Айтганингиздек, йиллар такрорланаётганига ўхшайди. Таркиб кенг бўлмаса шунақа қийинчиликлар бўлаверар экан. Ҳам ўзимизда чемпионликни ўйлаяпман, ҳам Осиёда яхши қатнашишни. Бу жуда қийин иш. Бугун ўйнаган жамоамиз толиқиб бўлди. Икки кундан кейин эса навбатдаги баҳс кутмоқда ва энг яхши таркибни аниқлаб олишимизга тўғри келади.

- Нима деб ўйлайсиз, чемпионлик пойгаси тугадими?

- Тугагани йўқ, нега энди тугаши керак? Ҳозирги пайтда биринчи ўриндамиз. Нима учун бизни ҳисобдан чиқаришяпти? Ҳали кураш тугагани йўқ. Ҳаммада имконият бор.

- Бугун Ойбек Бозоров майдонда кўринмади.

- Ҳа, у қаттиқ бетоб бўлиб қолди. Шу боис қайдномага киритмадик.

- Бугун "Навбаҳор" сафида энг яхши ўйин кўрсатган фтуболчи ким бўлди?

- Рақиб таркибида ҳамма ўзининг яхши ўйинини кўрсатишга ҳаракат қилди. Шу боис жамоадаги барча таҳсинга лойиқ.