Равшан Ҳайдаров: "Ҳеч кимдан қўрқмаймиз, лекин ҳар бир рақибга ҳурмат билан ёндашамиз"

 Унга кўра, Равшан Ҳайдаров бошчилигидаги Ўзбекистон U-23 терма жамоаси Қирғизистон, Шри Ланка ва Фаластин билан бирга "E" гуруҳидан жой олди. Бизнинг гуруҳ ўйинлари Қирғизистонда бўлиб ўтади. Ўзбекистон U-23 терма жамоаси бош мураббийи Равшан Ҳайдаров қуръа ташлаш якунлари ва келгусидаги режалар ҳақида қуйидагича фикр билдирди.

"Қуръа жараёнида саралашдаги рақибларимиз ва мезбон мамлакатни билиб олдик. Ёшлар миқёсидаги турнирларда ҳар қандай жамоадан кутилмаган натижалар чиқиши мумкин, чунки ёш футболчилар ҳар ойда ўзгариб, ўсиш жараёнидан ўтишади.

Қирғиз Республикасида футболга катта эътибор қаратилаяпти, янги майдонлар қуриляпти. Улар мезбон сифатида яхши тайёргарлик кўриши табиий — бу улар учун катта мотивация.

Фаластин термаси доимо сирли жамоа ҳисобланади. Мамлакат оғир шароитда эканига қарамай, кўплаб футболчилари Европада тўп суради.

Шри-Ланка ҳақида ҳозирча тўлиқ маълумотга эга эмасмиз. Улар билан аввал тўқнаш келмаганмиз, ўрганишни энди бошлаймиз. Ҳеч кимдан қўрқмаймиз лекин ҳар қандай рақибни ҳурмат қилишимиз керак.  Барча рақиблар бўйича маълумот йиғяпмиз, аммо асосий эътиборни ўз тайёргарлигимизга қаратяпмиз.

Футболчиларнинг Суперлигадаги ўйинларини кузатиб, тайёргарликка жалб қилиб, жамоа ўйинини шакллантиряпмиз. Аввалги U-20 терма жамоаси сафидаги кўп футболчилар ҳозир миллий жамоа ёки легионер сифатида фаолият юритмоқда. Улар ўрнига янги истеъдодларга имконият бераяпмиз.

Бизнинг асосий мақсад — U-23 Осиё Кубогига йўлланма олиб, футболчиларни катта мусобақалар учун тоблаш", — деди Равшан Ҳайдаров.