Ўзбекистонда миллий футбол термасининг ўйинларига электрон чипталар жорий этилади

Бу ҳақда, «Халқ сўзи» газетасига асосланиб, «Газета.uz» хабар бермоқда.

Ўзбекистон Футбол Федерацияси биринчи вице-президенти Сардор Раҳматуллаевнинг маълум қилишича, ушбу чора нархларни сунъий равишда ошириб юбориб, бозорда қайтадан сотаётган олибсотар-чайқовчилар устидан шикоят қилган фуқароларнинг мурожаатларига жавобан жорий этилади.

Сардор Раҳматуллаевнинг қўшимча қилишича, электрон чипталар пайдо бўлиши билан «олибсотарлар учун ҳеч қандай иш қолмайди».

Маълумот ўрнида, 2013 йил давомида Ўзбекистон миллий терма жамоасининг «Бунёдкор» стадионида ўтказилган ЖЧ-2014 саралаши доирасидаги расмий ўйинлари арафасида чипталар билан боғлиқ шов-шувли муаммолар рўй берган эди. Бунга, кўп жиҳатдан, чипталарнинг олибсотарлар қўлига чиқиб кетгани сабаб бўлган эди.