Отабек Валижонов: "Тақвим "Андижон" учун бироз ноқулай келганди"

- "Пахтакор"дан мағлубиятга учраганимиздан сўнг ўз уйимизда қандай бўлмасин "Локомотив"дан очко олишни ўйлагандик. Шунга монанд жамоамизнинг хар бири аъзоси ўзига яраша тайёргарлик кўрганди. "Темирйўлчилар"нинг ўтган турда "Навбаҳор" билан ўтказган учрашувини видео тасвир орқали кўриб чиққандик. Ўйлайманки тошкентликлар бизга нисбатан анча мазмунли ва кучли ўйнади. Агарда Наманганда кўрсатган ўйинини бизга ҳам намойиш қилганида ишонч билан айта оламанки, камида дуранг ўйнаган бўлардик. 

- "Андижон"га нима етишмади? Менимча ҳамма нарса етарли бўлди. Лекин тан олиш керак, рақиб кучлилик қилди. Буни тўғри қабул қилиш керак. "Андижон"нинг таркиби бу йил янгитдан тузилди. Шахсан мени жамоага келганимга энди бир ой бўлди. Футболчилар бир-бирини тўлиқ тушуниб кетишлари учун барибир вақт керак бўлади. "Локомотив" эса 3-4 йилдан бери асосан бир хил таркиб билан ўйнаб келмоқда. Шу жиҳатига ҳам эътибор бериш керак. Назаримда "Андижон" ҳам мамлакатимизнинг етакчи клубига қарши ёмон ўйин кўрсатмади.

- Тақвим ҳам "Андижон" учун бироз ноқулай келгандек. Бу баҳона эмас. Лекин дастлабки турларда етакчи клубларга қарши ўйнадик. Умид қиламанки, омадсизликлар ортда қолди. Кейинги турларда мухлисларимизни хурсанд қиламиз деган умиддаман.

- Фурсатдан фойдаланиб бугун жамоамизни ажойиб тарзда бутун учрашув чоғида қизғин-қўллаб қувватлаб турган ишқибозларимизга миннатдорчилик билдираман, - дейди Отабек Валижонов

"Андижон" матбуот хизмати.