Отабек Нарзуллаев: “Кейинги тақдиримни қайси жамоа билан боғлашим ушбу ҳафтада аниқ бўлади”

Вазиятга ойлдинлик киритиш мақсадида футболчининг ўзи билан суҳбатлашганимизда қуйидагиларни айтиб ўтди.

- Яширмайман, хориж клубидан таклиф бўлгани рост. Агентим ҳозирда Малайзия клубларининг бири билан музокара олиб бормоқда. Тўғриси, ўзимизнинг жамоалардан ҳам чорловлар бўлмоқда. Аммо якуний тўхтамга келиб улгурмадим. Насиб қилса ушбу ҳафтада кейинги тақдиримни қайси жамоа билан боғлашим аниқ бўлади.

- “Шўртан” билан амалдаги шартномам якунига етди. Ҳозирда эркин агентман. Лекин ғузорликлар билан тўлиқ ҳисоб-китоб қилинмади. Жамоанинг қачон йиғилиши борасида аниқ гап йўқ. Клуб вакилларининг ҳеч бири ҳозирча биз билан боғланмади. Ўйлайманки “Шўртан” бу йил про-лигада муносиб қатнашади ва яна супер лигага йўл олади.

- Тўғриси, ўтган мавсум “Шўртан” учун жуда ҳам оғир кечди. Маълум сабабларга кўра, жамоани ФИФА кучлилар сафидан четлатди. Мавсум ўртасига келиб, бундай қарор чиқарилиши жамоадаги ички муҳитга ўз таъсирини ўтказмасдан қолмади. Воқеалар ривожи бундай тус олишини ҳеч ким кутмаганди. Қолаверса жамоада юзага келган молиявий муаммолар ҳам натижанинг салбий кўриниш олишига ўз таъсирини кўрсатди.

- Агарда бу каби муаммолар юзага келмаганида, бемалол айта оламанки “Шўртан” мавсумни 8 ёки 9-ўринда якунлаган бўларди. Бундай дейишимнинг боиси таркибимизда маҳоратли ўйинчилар талайгина эди. Жамоавий ўйин яхши шакллантирилган. Ўз майдонимизда ҳар қандай рақибдан очко тортиб олишни ҳам уддалагандик.

- “Шўртан”нинг ўтган мавсумдаги салбий натижасини инобатга олмаганда, ўз фаолиятимдан қисман кўнглим тўлмади. Лекин таркибдаги футболчилар янада яхшироқ ўйин кўрсатганида, кўпроқ очко жамғаришимиз эхтимолдан холи эмасди. Нима ҳам дердик бу – хаёт – дейди Отабек Нарзуллаев.    

Исломбек Рустамбеков.