Омад кулиб боққан футболчи ҳақида

"Аталанта"да Алексей Миранчукнинг ҳозирча ишлари унча юришмаяпти. А Сериянинг охирги 10 турида бергамоликлар атиги 3та ўйинда ғолиб бўлишди, етакчилар гуруҳидан сезиларли даражада ортда қолиб кетишмоқда. Бунинг сабабларидан бири — жамоани ҳар томондан ўраб олган жароҳатлар эпидемияси. Клубнинг асосий ҳужумчиси Дуван Сапата 6 февралдан бери ўйнамаяпти, иккинчи форвард Луис Муриэль эса жорий йилда бор йўғи 2та гол урди. Гасперини охирги, "Болонья"га қарши учрашувда, Миранчук, Малиновский ва жамоанинг янги ўйинчиси Жереми Богасиз таркибни шакллантиришига тўғри келди. Ҳақиқий фожеа.

Мураббий бор эътиборини ёшлардан иборат таркибга қаратди. Улар орасида охирги ойда ўзини кўрсата олаётган гвинеялик Мустафа Сиссе ҳам бор эди. Йигитча "Женоа" билан учрашув қайдномасига киритилди. Ундан кейинги баҳсда эса 18 ёшли ҳужумчи катталар футболида дебют қилди. Сиссе "Болонья"га қарши ўйиннинг 65-дақиқасида майдонга тушди ва орадан 17 дақиқа ўтиб, учрашувдаги ғалаба голини урди.

Мустафанинг ўтмиши худди эртакка ўхшайди: 2 ой ичида қочқинлар жамоасидаги ўйинчидан А Серияда гол уришга эришди. Сиссе "Аталанта"нинг ёшлар жамоасида 27 февралда дебют қилган эди. Унга қадар "Rinascita Refugees"да (қўпол таржима қилганда — қочқинлар интеграцияси) тўп тепарди. Бу жамоа Италиянинг 8-дивизионида ўйнайди.

Мустафа 2003 йил Гвинеянинг Канкари шаҳрида туғилган. У 16 ёшида отасидан айрилди. Шундан сўнг ҳаётида кескин бурилиш қилишга қарор қилди ва бошқа мамлакатга, Италиянинг Саленто ярим оролидаги Лечче шаҳарчасига кўчиб келди. Бу ерда унга бошқа мамлакатлардан келган муҳожир ва қочқинларнинг мамлакатга мослашиш жараёнлари билан шуғулланидаган "Rete!" дастури ёрдам берди. Муҳожирларни бирлаштириш усулларидан бири — футбол. Мустафа ўзини тезда футболда кўрсата олди.

Сиссе ўзининг голлари билан жамоаси бир поғона юқорига, 7-дивизионга чиқишига ёрдам берган ва "Аталанта" скаутлари эътиборига тушган. Шартнома ҳам тез имзоланди — 23 февраль куни Мустафа "Аталанта" тизимига қўшиб олинди, 27-санада ёшлар сафида дебют қилди ва "Милан" примавераси дарвозасига 2та гол урди. 9 мартда эса "Наполи" ёшларига қарши баҳсда ғалаба голини нишонлади.

Мустафанинг иқтидори шу қадар яққол намоён бўлдики, "Аталанта" ҳаттоки, Европа Иттифоқидан бўлмаган футболчи учун қайдномада махсус жой ажратди — Италияда легионерлар учун ўзига хос чекловлар мавжуд. Сиссе ўйин услуби жиҳатдан қайсидир маънода Дуван Сапатани эслатади. Фақат фарқи шундаки, сифатли кураш олиб бориш учун ҳозирча Мустафага бақувват мушаклар етишмайди. Бироқ ҳужумчининг бошқа устун томонлари бор: голни ҳис қилиш, пластика ва вазиятни сифатли якунлаш.

Афтидан, "Аталанта"да ўзига хос ўтмишига эга янги юлдуз порлаш арафасида турибди. Уни эслаб қолинг. У тез кунда мухлислар орасида машҳур бўлиб, "Аталанта"нинг муҳим ўйинчиларидан бирига айланса ажаб эмас!

Нозима Зарипова таржимаси