"Олмалиқ"нинг бугунги рақиби: "Карпати" (Львов, Украина)

"Олмалиқ"нинг бу галги рақиби Украина премьер лигаси вакили "Карпати" бўлади. Белоруссиялик Олег Дулуб бош мураббийлик қилаётган Львов шаҳри жамоаси жорий мавсум биринчи давраси якунига кўра мусобақа жадвалининг сўнгги поғонасини банд этиб турибди. Бунга ФИФА томонидан клубга нисбатан ишлатилган санкция ҳам сабаб бўлган. Ҳалқаро футбол қўмитаси "Карпати" ва "Днепр"дан 6тадан очко олиб ташлаш бўйича қарор чиқарган. Кўп йиллик тарихга эга жамоа учун бу ўрин муносиб эмасдек. Украина жамоаси хорижий йиғин орқали вазиятни ижобий томонга ўзгартиришга ҳаракат қилмоқда. Биринчи даврада жамоа сафида биргина аргентиналик легионер Густаво Бланко-Лешук бор эди. 17 ўйинда 7 гол урган форвард Донецкнинг "Шахтёр" жамоасига трансфер бўлган.

Жамоамиз билан битта меҳмонхонада истиқомат қилаётган львовликлар 18 январь куни Қаршининг "Насаф" жамоаси билан ўртоқлик ўйини ўтказишди. Унда ҳамюртларимиз 3:1 ҳисобида ғалаба қозонишди.

Дарвоқе, ўтган мавсум "Олмалиқ" шарафини ҳимоя қилган Ярослав Мартинюк айнан шу жамоадан келганди.

Бугунги баҳс Тошкент вақти билан 13:00да меҳмонхонага қарашли "Топ капе" спорт мажмуасида бошланади.