Никола Лазаревич: «Вазиятлардан унумли фойдаланиб, муҳим ғалабани қўлга киритдик»

- Шиддатли ва муросасиз беллашув учун рақибмиз «Сурхон»га миннатдорчилик билдираман. Янги мавсумга қуръа ташлангандаёқ рақибимизнинг ўйинини ўргана бошладик. «Сурхон» ҳам биз сингари Туркияда ўқув-машғулот йиғинини ўтказди ва йиғин давомида юқори савиядаги жамоалар билан назорат учрашувларини ўтказди. Рақиб яхши шаклланган, таркибнинг асосий қисми бир неча йиллардан буён бир жамоа сифатида тўп тепиб келмоқда. Улар майдонда бир-бирларини жуда яхши тушунишади. Бизда эса бу йил таркибнинг ўзаги қайтадан шакллантирилди. Шу сабаб оғир учрашув бўлишини билардик. Тайёргарликни шунга мос равишда олиб бордик. Ўйинда ташаббусни ўз қўлимизда сақлаб туришга интилдик. Гол урилгач рақибнинг ҳужумларини бартараф этиб, қарши ҳужумда ўз имкониятларимиздан самарали фойдаланишни истагандик. Амалда бу режамиз иш берди. Шу сабабли яна гол уриб, ғалабани ўзимиз томонга оғдириб олдик. Умуман олганда ўйинда ҳар иккала жамоада гол уриш учун имкониятлар бўлди. Фақат биз бу имкониятдан фойдаландик. Бугунги ўйин тарихга айланди. Эртадан кейинги рақибга қарши тайёргарликни бошлаймиз. Хатоларимизни кўриб чиқиб, таҳлил қиламиз.

- Ўйин охирларида майдонда иккита номинал ҳужумчи Папарига ва Лобжанидзе ҳаракат қила бошлади. Жамоа ўйинни битта асосий ҳужумчи билан бошлаганди. Икки ҳужумчини ўйнатишдан мақсад нима эди?

- Лобжанидзе майдонга тушгач, Папарига ҳужумкор ярим ҳимоячи позисиясига ўтди. Тактик режамизга бироз ўзгартириш киритишга қарор қилгандик.