“Насаф” бугун иккига бўлинган ҳолда назорат учрашуви ўтказди

Учрашувда футболчилар кўк ва оқ кийимда майдонга тушишди. Демак, уларни шартли равишда “Кўклар” ва “Оқлар” деб атаймиз.

Учрашувдаги ҳисобни дастлаб, “Кўклар” таркибида майдонга тушган ва бу йилдан асосий таркиб ўйинчисига айланган “Насаф” футбол мактабини битирган 17 ёшли ярим ҳимоячи – Худойберди Ҳолиқов томонидан очилди. Учрашув бошидан ташкил этилган ҳужумда у Ўткир Юсуповни дарвоза тўридан тўп олиб чиқишга “мажбур” қилди.

Шундан кейин учрашув тенг курашлар остида кечди. Ўйинчилар ҳар қанча ҳаракат қилишмасин дарвозаларга бошқа гол киритилмади.

Иккинчи бўлимда “Оқлар” орадаги ҳисобни тенглаштиришди. Бунда жамоанинг тўпурари Артур Геворкян голга муаллифлик қилди.

Учрашув ана шу ҳисобда якунланди. Шу ерда янги ўйинчиларнинг майдондаги ҳаракатлари тўғрисида қисқача таасуротларимизни айтиб ўтсак, дастлаб словениялик легионер Рой Рок ўйини ҳақида, ушбу чап қанот ҳимоячиси ўзининг майдонни кўра билиши, рақиб футболчидан тўпни олиб қўйишни уддалаши, жамоадошларига аниқ тўп етказиб бериши ва бошқа жиҳатлари билан эътиборимизни тортди. У ўз жойида шошмасдан аниқ ҳаракат қилишидан, Рўзиқул Бердиевни ўйинчи танлашда адашмаганини айтиш мумкин.

Олександр Каблашга гол уриш насиб этмаган бўлсада, чиройли ҳаракатлари билан стадионда йиғилган кам сонли мухлисларни олқишига сазовор бўлди.

Марказий ярим ҳимоя чизиғида ҳаракат қиладиган Баҳром Абдураҳимовдан ҳам кўп нарсаларни умид қилса бўладиган ўйинчи кўринади. Унинг майдонда тинмасдан ҳаракат қилиши, имкон бўлганда ўзоқдан бўлса ҳам дарвозага кутилмаган зарбаларни бериши бизни диққатимизни тортди.

Шунингдек кўп мухлислар ўйинини соғиниб қолган Шоҳруҳ Гадоевдан ҳам ташвишланмаса бўладиган кўринади. У аввалги Шоҳруҳ бўлиши учун кўп меҳнат қилгани кўриниб турибди. Бошқа ўйинчилар ҳам кўнгилдагидек. Хуллас, бир қарашда хавотирга ўрин йўқдек, фақат жамоа 25 февраль куни бор имкон ва маҳоратларини ишга солиб, мухлисларни хурсанд қилишса бўлди.

Энди бугун майдонга тушган ўйинчилар билан танишинг:

“Кўклар”: 25.Элдорбек Суюнов, 6.Азиз Ғаниев, 9.Илҳом Шомуродов, 15.Рой Рок, 34.Фарруҳ Сайфиев, 27.Илҳом Юнусов, 33.Одилбек Ҳамробеков, 4.Мақсуд Каримов, 29.Худойберди Ҳолиқов, 38.Дониёр Нарзуллаев, 32.Ҳамза Каримов.

“Оқлар”: 30.Ўткир Юсупов, 5.Ботир Қораев, 23.Шерзод Аъзамов, 7.Акром Бахритдинов, 18.Баҳром Абдураҳимов, 19.Шароф Муҳиддинов, 20.Эркин Бойдуллаев, 22.Шоҳруҳ Гадоев, 17.Артур Геворкян, 28.Шуҳрат Муҳаммадиев, 99.Олександр Каблаш.

Жамоа кунда икки маҳалдан машғулотларни олиб бормоқда.