Моуринью июнь ойида Португалия термасида иш бошлаши мумкин

Жозе Моуринью Португалия терма жамоаси бош мураббийлигига асосий номзод ҳисобланади.

"Record" хабарига кўра, Португалия бош мураббийи лавозимини тарк этган Фернанду Сантуш ўрнига асосий номзод ҳозирда "Рома"ни бошқараётган мутахассис бўлиб турибди. Моуринью аллақачон бу масала ҳақида гапирган – ҳозирча фақат норасмий алоқалар бўлган. Айни дамда унинг тайинланишига 2024 йилгача мўлжалланган "Рома" билан амалдаги шартнома тўсқинлик қилмоқда.

Моуринью терма жамоа ва "Рома"даги ишни бирлаштирмоқчи эмас. Римликлар ҳам бу вариантга қарши.

Қайд этилишича, айни дамда вазият оғирлигича қолмоқда.

Мавсум давом этар экан, Моуринью Португалия терма жамоасини бошқармаслиги аниқ. Агар Португалия футбол федерацияси "Рома" билан келишувга эришса, тайинлов июнь ойида амалга ошиши мумкин. Мураббийга 2026 йилги Жаҳон чемпионатигача шартнома таклиф қилинган.

Агар Моуринью ва "Рома" рози бўлса, ҳозирда ёшлар жамоасида ишлаётган Руй Жорже ёзгача Португалия терма жамоаси вақтинчалик бош мураббийи бўлиши мумкин.

Португалия футбол федерацияси Моуринью Евро-2024 саралаш босқичи бошланишидан олдин терма жамоа бошқарувига келишини истамоқда.