Миржалол Қосимов «Бунёдкор» - «Ал Фатҳ» учрашувини стадионда томоша қилди

Ўтган ҳафтада расман Тошкентнинг «Бунёдкор» жамоаси бош мураббийи лавозимидан озод этилган ва эндиликда фақат миллий терма жамоада фаолият олиб борадиган Қосимов, «Бунёдкор» клуби иштирокидаги ўйинда миллий терма жамоага номзод бўлган футболчиларнинг ўйинини кўздан кечирди.

Таъкидлаш жоиз, Ўзбекистон миллий терма жамоаси 27 ва 29 май кунлари Тошкентда Уммон терма жамоасига қарши ўртоқлик учрашувларида майдонга тушади. Май ойи бошларида миллий терма жамоа ушбу ўйинлар олдидан Тошкентда йиғин ўтказади. Бунгача эса Қосимов миллий терма жамоага номзод бўлган футболчиларнинг ўйинларини бевосита стадионларда кузатиши режалаштирилган.

Ўзбекистон миллий терма жамоаси ОК-2015 финал босқичи ўйинларигача бир нечта ўртоқлик учрашувларини ўтказиши ҳақида аввалроқ хабар берган эдик.