Мини-футбол: Республика биринчилиги Тўрткўл, Беруний ва Амударё туманларида ҳам бўлиб ўтди

Мусобақаларга биринчилардан бўлиб Наманган шаҳрида старт берилганлиги ва қайд этилган натижалар ҳақида маълумот берганмиз. Мусобақа 27-28 январь кунлари Қорақалпоғистон Республикасида ҳам давом этди.

Махсус футбол мактаб-интернетлари, Олимпия захиралари коллежи, Болалар ва ўсмирлар футбол мактаблари, Ихтисослашган болалар ва ўсмирлар спорт мактаблари ҳамда Болалар ва ўсмирлар спорт мактабларининг футбол тарбияланувчилари ўртасида ташкил этилаётган мусобақа Қорақалпоғистон Республикасининг Тўрткўл (7та жамоа), Беруний (7та жамоа)  ҳамда Амударё (3та жамоа)  туманларида ташкиллаштирилди.

Қизиқарли кечган баҳсларда ёш тоифалари бўйича ғолиб ва совриндорлар аниқланди:

11, 12, 13, 14, 15 ва 17 ёшлилар ўртасидаги мусобақаларда Тўрткўл тумани БЎСМи, 16 ёшлилар ўртасидаги баҳсларда эса Беруний тумани БЎСМи тарбияланувчилари биринчи ўринни эгаллашди. Амударё туманининг БЎСМ жамоаси фақатгина 17 ёшлилар ўртасидаги ўйинларда фахрли иккинчи поғонадан жой олди, бошқа гуруҳлардаги иккинчи ўринлар ҳам айнан Беруний ва Тўрткўл тумани вакилларига насиб этди.

Аввал қайд этганимиздек, мусобақани ташкил этишдан кўзланган мақсад мамлакатнинг барча ҳудудларида болалар  ва ўсмирлар ўртасида мини-футболни янада ривожлантириш ва оммалаштириш, ёш футболчиларнинг маҳоратини ошириш, Ўзбекистон ўсмирлар терма жамоасига иқтидорли ёшларни жалб қилишдан иборат.