Милан Митрович: "Суғдиёна" бу йил мухлисларга ОЧЛ йўлланмасини туҳфа қилмоқчи"

Жорий йилда юқори мақсадларни кўзлаган “Суғдиёна” жамоаси ҳам ўз таркибини бир қатор тажрибали футболчилар ва легионерлар билан кучайтиришга эришмоқда. Шунинг баробарида ўтган мавсумдаги таркиб ўзаги ҳам сақланиб қолинди ва айрим футболчилар билан шартнома узайтирилди. Ажойиб ўйинлари билан барчага таниш бўлиб улгурган ва жиззахлик ишқибозларнинг ёқимтойига айланган Милан Митрович ушбу мавсум ҳам жамоа дарвозасини ишончли қўриқлашда давом этади. Маҳоратли кипер биз билан суҳбатда жамоада қолганидан хурсандлигини яширмади.

- Милан, айни вақтда машғулотлар қандай кечмоқда? Янги қўшилган футболчилар чиқишиб кетиш қийин бўлмаяптими?
- Биз янги мавсумга тайёргарликнинг биринчи босқичини якунладик. Энди ҳал қилувчи машғулотлар бошланади. Кўп ҳолларда илк кунги машғулотлар футболчиларга ёқмаслиги табиий. Асосан югуриш билан чекландик. Ҳаво ҳам совуқ эди. Кейинги кунларда тўп билан ишладик, турли тактик машқларни бажардик. Суперлига баҳслари бошлангунига қадар формага кириб борамиз. Янги футболчилар кетганларнинг ўрнига келди. Мақсадларимизга эришиш йўлида улар ҳам фойда келтиради деган умиддаман. Жамоамизга келган ўйинчилар бари тажрибали. Уларнинг яхши ёки ёмонлигини айтиш менинг ваколатимга кирмайди. Ҳаммалари машғулотларда астойдил ишлашмоқда.

- 2019 йил жамоа учун ниҳоятда муваффақиятли якунланганди. “Суғдиёна” учинчи ўринни қўлга киритишга жуда яқин келганди. Демак, бу йил ўтган йилги натижани яхшилаш мақсад қилиб белгиланган бўлса керак...
- Ҳа. Биз тўртинчи ўрин билан кифояландик. Бу оҳирги ўн йилликдаги қайд этган энг яхши кўрсаткичимиз бўлди. Гарчи биз ОЧЛга чиқмаган бўлсакда, мухлисларнинг бизга нисбатан ишончи йўқолмади. Мақсадимиз янада юқори ўринлардан бирини банд қилиш ва шу орқали ишқибозларга ОЧЛ йўлланмасини туҳфа қилиш.

- Сизни жамоада қолганингиз кўплаб маҳаллий мухлисларга манзур келгани аниқ. Уларга айтадиган гапингиз борми?
- Ўзим ҳам сизга шуни айтмоқчи бўлиб тургандим. Ютсак ҳам, ютқазсак ҳам улар биз билан доим бирга. Учинчи ўринни қўлга кирита олмаганимизда жамоадаги барча футболчи бирдек айбдор. Энди бари тарихда қолди. Муҳими хатоларимидан тўғри хулоса чиқаришимиз зарур.

Абдулазиз Искандаров суҳбатлашди