"Металлург" куздаги уй ўйинларини ўз стадионида ўтказмайди

Клуб кузнинг уч ойидаги уй ўйинларини бошқа стадионда ўтказади. Лига бу борада "Ўзметкомбинат" АЖ кафолатини қабул қилиб олди. 

2024 йилги мавсумдан бошлаб Бекободдаги футбол стадиони майсаси талаб даражасида бўлади. Стадион прожекторлари люксини кўтариш ишлари эса шу йилнинг 20 февраль санасига қадар якунланади. 2022 йилги мавсум якунига кўра ёриткичлар 1000 люксни ташкил қилаётганди. Харид қилинган техника билан 20 кун ичида стадион прожекторлари люкси 2000 люксга олиб чиқилиши режалаштирилган. 

(Сурат 7 ноябрь кунги "Металлург" — "Навбаҳор" (0:1) учрашувида олинган)

Лига стадионлар масаласида режа асосида иш олиб бормоқда. 2023 йилги мавсум старти 4 та стадион: "Жар", "Бунёдкор", "Локомотив", "Истиқлол" U-20 Осиё чемпионатига жалб қилингани, 3 та стадион: "Сўғдиёна", ОКМК, "Бобур Арена" майсасини янгилаётганидан келиб чиқиб, қатор мушкулликлар келтириб чиқаради. Шунга қарамай, Суперлигани 3 март санасидан бошлаш режаси ўзгармаган.