“Машъал” 8та ўйиндан кейин ниҳоят ғалаба қозонди

Эътиборлиси “газчилар”нинг ғалабасиз серияси 8та ўйиндан сўнг барҳам топди. Боиси Александр Хомяков бошқарувидаги жамоа сўнгги бор, чемпионатнинг 13-турида ўз уйида “Хоразм”ни қабул қилиб, 2:0 ҳисобида ғалаба қозонганди. Шундан сўнг муборакликларни сира таниб бўлмади дейиш мумкин. Негаки, “Машъал” ортда қолган 8та ўйиннинг 4тасида дуранг қайд этиб (“Истиқлол” – “Машъал” 1:1, “Машъал” – “Динамо” 0:0, “Машъал” – “Андижон” 2:2, “Машъал” – “Норин” 0:0), қолган 4та учрашувда рақибларига имкониятни бой бериб (“Норин” – “Машъал” 2:1, “Андижон” – “Машъал” 2:1, “Динамо” – “Машъал” 2:0, “Машъал” – “Истиқлол” 1:2), қимматли очколарни қўлдан чиқариб келаётганди.

4 сентябрь, сешанба куни “Машъал” жамоаси ниҳоят ушбу ёқимсиз сериясига нуқта қўйди. Аҳамиятлиси 8та тур ўтиб, “газчилар” яна “Хоразм”ни мағлуб этди. Фақат бу сафар ўйин Урганчда кечди. Эътиборлиси муборакликлар учрашувнинг 90+5-дақиқасида рақиб дарвозасига иккинчи тўпни киритиб, ғалабани илиб кетди.