Мансур Саидов, Дилёрбек Эрматов, Иқбол Бобохонов "Истиқлол" жамоаси йиғинига қўшилди. Стадионда ишлар авжида

Фарғонадаги "Истиқлол" ўйингоҳида илк кунги машғулотларни олиб борган жамоа аъзолари тикланиш машқларини олиб боришди. Таркибдаги ўзгаришлар ҳақида гап борар экан, ўз олдига Про лигада жиддий кураш олиб боришни мақсад қилган жамоа сафини бир қатор тажрибали ижрочилар ҳисобига бойитмоқда. Ўтган мавсум "Нефтчи" жамоаси шарафини ҳимоя қилган Мансур Саидов, Дилёрбек Эрматов, Фаррух Турдалиевлар "Истиқлол" йиғинига келиб қўшилди. Шунингдек клуб собиқ футболчиси Мўйдин Мамазулуновни ҳам ортга қайтарди. Футболчи 2020 йилнинг иккинчи даврасини "Оқ-тепа" жамоасида ўтказганди. Бундан ташқари фарғоналик мухлисларга яхши таниш бўлган Иқбол Бобохонов, Шоҳруҳ Муротов,  Элёр Мамасолиев, Хушнуд Бозоров, Достон Ўринбоев, Абдуҳолиқ Қурбонов, Раҳматилло Ўктамов ҳам айни вақтда машғулотларда иштирок этмоқда.

Марказий стадионда ҳам янги мавсумга қизғин ҳозирлик кетмоқда. 

Мазкур стадион Про лига иштирокчилари - "Нефтчи" ва "Истиқлол" жамоаларининг уй ўйингоҳи ҳисобланади. Бундан ташқари "Истиқлол" спорт мажмуасининг асосий ҳамда бир нечта заҳира майдонларида турли футбол мусобақалари, хусусан Фарғона вилояти 2-лига баҳслари ташкил этиб келинади.

Ҳозирда Фарғона вилояти ҳокимлиги, Фарғона шаҳар ободонлаштириш бошқармаси ташаббуслари стадионда таъмирлаш, хусусан янги мавсумга тайёргарлик ишлари жадаллик билан олиб борилмоқда. Шунингдек, биз билан суҳбатда бўлган "Истиқлол" стадиони ходими Нодирбек Саидовнинг маълумот беришича, стадион ўзининг янги логотипига эга бўлди.

Фотосуратлар муаллифи Бекзод Толибов ўз мухбиримиз