Жасур Абдураимов: "Ҳозирги Австралия кучли эмас. Футболчилари роботга ўхшайди"

Учрашув даражаси ниҳоятда юқори. Ғолиб шу йили Токиода бўлиб ўтадиган ёзги олимпия ўйинларига йўлланма олади. Муҳим ўйин олдидан ёшлар билан ишлаш бўйича мутахассис, ўз вақтида ёшлар терма жамоаси билан Австралия олимпия терма жамоасини мағлубиятга учратган Жасур Абдураимов рақиб ва футболчиларимиз ҳақида фикр билдирди.

"2016 йил Баҳрайнда ўтказилган ёшлар ўртасидаги Осиё чемпионатида улардан устун келганмиз. Назаримда ўша пайтдаги Австралия ҳозиргисидан кучлироқ эди. Мутахассислар ҳам буни бир неча маротаба таъкидлашган. Бугунги рақибимиз жисмонан бақувват, лекин бемалол ўйнаса бўлади. Мағлубиятга учратиш мумкин. Бизда индивидуал футболчилар кўп, улар ўзларини кўрсатишлари шарт. Шу вақтгача тўртта пенальти ишладик.

Рақибда ташкилотчилик яхши, бироқ футболчилари роботга ўхшайди. Техника ва индивидуал унчалик кучли эмас. Жамоа ўйинни қўрқмасдан ўз қўлига олиши керак. Рақиб жарима майдончаси ичида ҳужумларни тугаллашда аниқ ҳаракат қилинса ғалаба бизники. Фикримча, таркибда ротация қилиш лозим, айниқса бундай баҳсларда",- деди олимпия ва ёшлар терма жамоаси собиқ бош мураббийи Жасур Абдураимов.

Абдулазиз Искандаров ёзиб олди