Жасур Абдураимов: “Эрон Осиёнинг энг яхши жамоаларидан бири”

Манама. Баҳрайн.

Чорак финал ўйинлари олдидан ўтказилган матбуот анжумани.

Ўзбекистон U-19 терма жамоаси бош мураббийи Жасур Абдураимов навбатдаги рақиб Осиёнинг энг яхши жамоаларидан эканини ва унинг шогирдлари ўйинга тайёр эканини айтиб ўтди.

“Эрон Осиёнинг энг яхши жамоаларидан бири. Жисмоний жиҳатдан бақувват ҳамда техникаси яхши бўлган футболчиларга эга. Жамоанинг тактик жиҳатдан ҳам яхши ўйнай олишини биламиз. Аммо, бизнинг жамоа уларга қарши ўйинга тайёр. Умуман олганда, айни дамда иштирокини давом эттираётган барча жамоа турнирга муносиб жамоалар”, - деди Жасур Абдураимов.

“Биз Хитойга қарши сўнгги тур ўйинида айрим асосий ўйинчиларимизга дам бердик. Уларга жиддий ўйин олдидан дам беришимиз муҳим. Аммо, ўша куни таркибда майдонга тушган футболчилар ҳам ўзларини кўрсатишди. Бизнинг таркибдаги ўйинчиларнинг деярли барчасини синовдан ўтказдик ва асосий ўйинларда майдонга тушишга ким тайёрлиги борасида керакли хулосага келдик. Бизнинг жамоамизни Эронга қарши жуда қизиқарли ва жиддий ўйин кутиб турибди. Ўйин барчага ёқадиган даражада яхши ва савияли ўйин бўлишига умид қиламиз”, - деди Ўзбекистон U-19 терма жамоаси бош мураббийи.

Амирҳусайн Пейровани (Эрон): “Бизнинг жамоамиз бу ўйинга тайёр. Ўзбекистон турнирнинг энг кучли жамоаларидан бири ва уларга қарши бизга қийин бўлиши аниқ. Эрон ёшлар терма жамоаларининг аввалги турнирлардаги натижалари ҳақида ўйламасдан бугунги ўйинга тайёргарлик кўришими лозим. Бизни бугунги ўйин қизиқтирмоқда. Умид қиламанки, ўйин фэйр плей қоидалари асосида ўтади ва жамоалар яхши ўйин намойиш этишади”.