Илҳом Мўминжонов: "Раҳбарият олдимизга кучли учликдан ўрин олиш вазифасини қўйган"

"Нефтчи"нинг ашаддий мухлисларини ғалаба билан табриклайман. Раҳбарият олдимизга кучли учликдан ўрин олиш вазифасини қўйган. Шунинг учун йиғин давомида мавсумга жиддий тайёргалик кўрдик ва фалсафамизга мос келадиган футболчиларни олиб келдик. Мураббийлар штаби билан бу вазифани уддалашимиз шарт", – деб гап бошлади Мўминжонов. 

- Бугунги баҳс ҳақида фикрларингиз...

- Чиройли ўйин бўлди. Биринчи ўйин бўлгани боис икки жамоа ҳам эҳтиёткор тарзда ўйнади. Бу дастлабки 15-20 дақиқада яққол сезилиб турди. Иккита 100 фоизлик имкониятга эга бўлдик. Захирадан тушган футболчимиз ҳам вазиятдан унумли фойдалана олмади. Жароҳатланганлар жуда кўп – Дониёр Нарзуллаев, Ҳусниддин Ғофуров, Лутфулла Тўраев, Шаҳзод Убайдуллаев. 4 та асосий футболчимиз жароҳатда бўлиб турибди. Менимча, улардан иккиси 4-5 тур майдонга тушмайди. Бироқ иккита бир хил таркибга эгамиз. Захирадан тушган футболчиларимиз ўйин темпнини ушлаб туришди ва голли вазиятлар яратиб, пеналбти ишладик ҳамда "Қўқон-1912"ни мағлуб этдик.

- Лутфулла Тўраевнинг биринчи таймдаёқ жароҳат олиши сизни қийин ҳолатга солиб қўйди. Бу ҳолатдан қандай чиқиб кетдингиз?

- Тўраев жароҳат билан бўлса-да, ўйнаб берди. Раҳбарият кучли учликка кириш вазифасини қўйган экан, бу тўсиқ бўлмаслиги лозим. Бу ҳар бир мураббийнинг орзуси саналади. Босимдан эса қўрқмайман. 

- Селекционер мураббийлар бир нарсага эътибор беришмаяпти. Масалан, қўқонлик Жасур Ёқубов "Пахтакор"га ўтди, Акром Комилов АГМКда ўйнамоқда ёки Рустам Ашурматовни "Навбаҳор" олди. Сиз шунга қандай қарайсиз? 

- Ёқубов трансфери устида жиддий шуғулланган эдик. Чемпионат тугаши билан "Локомотив" уни қўлга киритиб бўлган экан, кейин кетганида бизда ҳимоячилар бор эди. Кейин у "Локо"дан кетиб, "Пахтакор"га ўтди. Ашурматов билан ҳам музокаралар бўлганди, аммо у "Навбаҳор"ни танлади. Маҳаллий футболчилардан сафимизда Анвар Ғофуров тўп тепмоқда.

- Жамоанинг олдига катта вазифа қўйилганини айтдингиз. Бу учун яхши савиядаги ҳужумчилар керак. Жамоада тўпурар футболчилар борми? 

- 3 та ҳужумчимиз бор. Булар – Марко Шарич, Шаҳзод Убайдуллаев ва Улуғбек Ҳошимов. Уларга ишонч билдирдик. Яхши формада бўлишса, голлар уриб, жамоага катта фойда келтиришади. 

- 4 та етакчида жароҳат мавжуд дедингиз. Улар "Пахтакор" билан баҳсгача сафга қайтишадими?

- Шаҳзод Убайдуллаев озроқ ўйнай олса керак. Менимча, шифокорларимизни айтишлари бўйича Лутфулла Тўраев, Ҳусниддин Ғофуров ва Дониёр Нарзуллаев майдонга туша олишмаса керак. 

- Белгиланган пенальти ҳақида фикр билдириб ўтсангиз...

- Бугун савияси баланд ҳакамлар ишлади. ВАРда кўриб чиқиб, шундай хулосага келишди. Вазиятни кўрмасдан туриб, бир нима дея олмайман. Аллоҳга шукрки, бугун ғалаба қозондик. Кейинги ўйинларда "Қўқон-1912"га омад!