Илҳом Комилов: "Биринчи бор дербида ўйнадим"

-Илҳомжон ғалаба муборак.
Раҳмат. Бугун биз ўзимиз учун жудаям муҳим бўлган ғалабани қўлга киритдик. Ўйин оғир бўлди, айниқса охирги дақиқалар ҳаяжонли бўлди. Бугун бизда ғалабага бўлган ишонч ва шижоат  кўпроқ бўлди шунинг учун ғалаба биз томонда бўлди.

- Сиз олдин ҳам дербиларда иштирок этганмисиз?
Йўқ бу мани илк дербидаги ўйиним ва илк ўйиндаги ғалабадан жуда ҳам хурсандман. Водий дербилари ҳақида йигитлардан эшитардим. Ҳақиқатан хам дерби муросасиз ва шиддатли бўлди.

-Бу ўйинда  «Андижон» жамоасининг қайси ўйинчисига қарши ўйнаш қийин бўлди?
Бугун андижонликларнинг ҳар бир ўйинчисига қарши осон бўлмади. Лекин барибир тажрибали Анвар Бердиев ўйин охиригача бизни таҳликада ушлаб турди.

-Сиз қўқонликлар таркибига иккинчи даврада қўшилдингиз. Ҳимоя чизиғидаги рақобат сизни чўчитмайдими?
Албатта жамоамизда яхши тажрибага эга футболчилар йиғилган. Рақобат бор жойда ўсиш бўлади, жамоанинг асосий таркибида мустаҳкам ўрин олишга ҳаракат қиламан.

- Олдинда «Олмалиқ» ва «Машъал» жамоалари билан уйдаги  ўйинлар кутиб турибди. Сиз бу ўйинлардан қандай натижа кутмоқдасиз?
Уйдаги ўйинларда деворлар ҳам ердам беради деган гап бор. Биз ўз мухлисларимиз олдида ҳар қандай рақибга муносиб қаршилик кўрсатамиз. Қўқонда ажойиб мухлислар бор уларнинг қўллаб қувватлашлари футболчиларга янада куч-ғайрат бахшида қилади. Шунинг учун биз  уйдаги уйинларда мухлисларни ғалаба билан хурсанд қилишга  қўлдан келганча ҳаракат қиламиз.

Акрамжон Мамадалиев суҳбатлашди.