Ҳамиджон Актамов: "Ўзбекистонда яхши шароитларга эга бўлган саноқли футбол клублари бор - "Турон" шулар қаторига кириб улгурибди"

"Бугунги Ҳайит байрами билан барча юртдошларимизни табриклайман. Шундай кунда мухлисларимизни қувонтирганимиздан хурсандмиз. Жуда ҳам қизиқ ўйин бўлди, анчадан буён бундай кўп мухлис қаршисида ўйнамагандик.

Ким гол урса ўша ғалаба қозонарди, битта голгача ўйин бўлди. Биринчи таймда кўп вазиятларга эга бўлдик, иккинчи таймда биринчи таймдан ҳам яхшироқ ўйнадик. Гол уриб ғалаба қозонганимиздан хурсандмиз. Шундай мухлис билан тўлиб тошган стадионда ғалаба қозониш ёқимли.

Бугун аслида "Турон" мағлуб бўлмади, балки шундай шароитларга эга бўлган клуб пайдо бўлгани бу ўзбек футболининг ютуғи. Стадионга кўплаб мухлислар келди ва завқ олишди. Кеча Яйпанга келгандик ва клубдаги барча шароитлар билан танишиб чиқдик. Ўзбекистонда яхши шароитларга эга бўлган саноқли футбол клублари бор. "Турон" шулар қаторига кириб улгурибди", - дейди Актамов.

- "Қизилқум" клубини қачон халқаро майдонларда кўришимиз мумкин?
- Насиб қилса мана шу мавсум юқори ўринларга эгаллашга ва халқаро майдонга чиқишга уринамиз. Ҳали мавсум олдинда, мақсадимизга етиша оламиз деб ўйлайман.

- "Турон"нинг ўйинини кўрдингиз, сизнингча кейинги ўйинда "Турон" ғалаба қозона оладими?
- Бу футбол. Биз ҳам биринчи турда ютгандик, кейин кетма-кет дуранглар ва мағлубият қайд этдик. Ниҳоят бугун ғалабага эришдик. "Турон"да яхши футболчилар кўп экан, легионерлар ҳам кучли эканлиги кўринди. Ўйиндан-ўйинга барчаси яхши бўлади деб ўйлайман.