Гвардиола "Реал" билан ўйин ҳақида: "Менга "қасос" сўзи ёқмайди. Бу "Ман Сити" учун яхши синов. Агар Мбаппе бўлмаса, Винисиус ёки Родриго бор"

Ўтган мавсумда "Мадрид" плей-оффнинг биринчи босқичида иккита ғалабага эришиб (3:2, 3:1), "Сити"ни мусобақадан чиқариб юборган эди. "Қаймоқранглилар" ҳужумчиси Килиан Мбаппе оёғидаги оғриқ сабаб чоршанба кунги баҳсда иштирок этмаслиги мумкин, ҳужумчи жамоанинг умумий гуруҳида шуғулланмади.

– Мбаппенинг йўқлиги сизни хотиржам қиляптими? Ўтган йилдан кейин ўч олиш истаги борми?

– Мен Мбаппесиз "Реал"га қарши кўп марта ўйнаганман ва уларда доим ажойиб таркиб бўлган. Биз уларга эмас, ўзимизга эътибор қаратишимиз керак. Мен "Реал"га қарши кўп марта ўйнаганман, ютганман ва ютқазганман. Аммо "қасос" – мен ишлатишни яхши кўрадиган сўз эмас.

Эртанги ўйин – биз учун яхши синов ва биз жиддий тайёргарлик кўрмоқчимиз, чунки бу жуда муҳим ва қизиқарли чорлов.

– Агар Мбаппе майдонда бўлмаса, кўп нарса ўзгарадими?

– Йўқ. Мбаппе – ўзгача футболчи, агар у "Реал" сафида бўлса, бу жамоа учун яхшироқ бўлади. Аммо бўлмаса, Винисиус ёки Родриго бор... Уларда жуда яхши футболчилар жамланган. Ким ўйнашидан қатъи назар, бизга қийин бўлади. Биз уларнинг характерини, ушбу стадионда ўйнаш қанчалик оғир эканини биламиз.

– Ҳозир "Бернабеу"га келиш учун энг яхши вақтми?

– Менда бу саволга жавоб йўқ, чунки ўз тажрибамдан келиб чиқиб айтсам, "Реал"га қарши ўйнаш ҳар доим қийин. "Сити"га келганимдан бери уларга қарши беш ёки олти марта ўйнадим ва ҳар доим қийин бўлган.

Айниқса, жамоанинг спорт формаси катта аҳамиятга эга бўлмаган ушбу турнирда. Чунки бу футболчилар муҳим ўйинларда ўз ўйин даражасини оширишади. Мен "Реал"дан ажойиб ўйин кутяпман ва бу ерда ўйнаш қанчалик қийинлигини шахсий тажрибамдан биламан.

– Ҳозирги "Реал" ўтган мавсумдагисидан нимаси билан кучлироқ?

– Тўғрисини айтсам, мен бу мавсумда "Реал"нинг кўп ўйинларини кўрганим йўқ. Биладиганларим шу ҳафта давомида кўрганларимизга асосланган. Улар кўпроқ прессинг қилмоқда, яккама-якка ўйнамоқда. Эртага улар шундай қилишадими ёки йўқ, билмайман.

Лекин шуни аниқ биламанки, ушбу стадионда ўйнаш ҳар доим оғир. Ва бу қизиқарли учрашув бўлади, – деди Гвардиола.