Ғарбий Осиёда шов-шувли хабар тарқалди

Баҳрайннинг энг номдор клубларидан бири "Муҳаррақ" 2019/2020 йилги мавсумда Саудия Арабистони Про лигасида қатнашади. Бу ҳақда Саудия Арабистони футбол федерацияси расман маълум қилди.

Агар Саудия чемпионатида қатнашишга Қувайт чемпиони ҳам розилик берса, унда кейинги йил Про лига клублари 16тадан 18тага оширилади. Ҳозирча Қувайт томон бу таклифга расман жавоб бергани йўқ. Агар қувайтликлар рози бўлишса, унда "Ал Қодисия" Саудия чемпионатига йўл олади.

"Муҳаррақ" клуби бош директори Иброҳим Ал Исса бу ҳақда шундай деди: "Биз Саудия Арабистони Про лигасида иштирок этишдан фақат хурсанд бўламиз, чунки бу жуда кучли чемпионат ҳисобланади. Бизнинг клуб ҳам ўзига яраша тарихга эга. "Муҳаррақ" 34 марта Баҳрайн чемпионлигини қўлга киритган. Масалан, Англияда "Кардифф Сити" билан "Суонси" Уэльс клублари ҳисобланади, лекин улар АПЛда қатнашиб яхши таассурот қолдиришмоқда. Биз ҳам шундай ўйнашга ҳаракат қиламиз".