Футзал. Фалькао фаолиятини тугатди

Икки карра Жаҳон чемпиони ҳисобланган 39 ёшли футзалчи Колумбияда бўлиб ўтаётган мундиалнинг нимчорак финалида Эрондан учралган мағлубиятдан сўнг ушбу қарорга келган.

Фалькао Колумбияда жами 10та тўп киритди ва Жаҳон чемпионатларининг энг яхши тўпурарига айланди. Унинг мундиаллардаги голлари сони 48тага етди. Аввалги рекорд бошқа бир бразилиялик футзалчи Маноэль Тобиасга тегишли эди. Тобиас 43та гол урган.

"Мен фаолиятимни хет-трик билан тугатаётганимдан ҳурсандман, лекин бу голлар ҳеч нарсани англатмайди, шунчаки рекордимни оширади холос. Ушбу голларимни бажонидил Жаҳон кубогига алмашган бўлардим", - дейди Фалькао ФИФА расмий сайтига берган интервьюсида.

Фаолиятидаги сўнгги учрашувдан кейин Бразилияни тўхтатиб қолган Эрон терма жамоаси аъзолари Фалькаони олқишлаб, ҳудди ғолиблар сингари осмонга отишди.