Футзал. 4-тур рамзий терма жамоаси

Беш кун давомида ўтказилган муросасиз учрашувларнинг рамзий терма жамоасини тузиб чиқдик. Демак, Олий лига 4-тур рамзий терма жамоаси қуйидагича кўриниш олган.

Дарвозабон: Аббосбек Ўлмасбеков (“Бунёдкор”)
Ўйинчилар: Жамолиддин Шарипов (“Олмалиқ”), Жўрабек Аҳмедов (“Когон”), Илҳом Ражабов (“Бунёдкор”), Элдор Ҳошимов (“Ардус”).
Заҳирадагилар: Алишер Ибрагимов (“Дўстлик-AIN”), Мухтор Абдукаримов (“Турон-С”), Константин Свиридов (“Олмалиқ”), Даврон Чориев (“Ардус”), Дилшод Ҳайдарқулов (“Нафис”).

Аббосбек Ўлмасбеков (“Бунёдкор”)
“Қалдирғочлар” дарвозабони тўртинчи турни ишончли тарзда ўтказди, бир неча мураккаб вазиятларда жамоасини голлардан қутқариб қолди. “Максам-Чирчиқ” билан кечган ўйинда эса ўз дарвозаси олдидан рақиб дарвозасини аниқ нишонга олди.

Жамолиддин Шарипов (“Олмалиқ”)
Терма жамоа аъзоси ҳисобланган Жамолиддин Шарипов 4-турда рақиб дарвозабонларини жами 13 бор ранжитди. У жорий мавсумда бир ўйинда энг кўп гол уриш борасидаги рекордни ўрнатди. “Пахтакор” билан кечган баҳсда 7 та голга муаллифлик қилди.

Жўрабек Аҳмедов (“Когон”)
“Когон” жамоасида ўтган мавсум Соҳиб Нарзуллаев етакчилик қилганди, бу йил эса бу вазифани “Пеле” (Жўрабек Аҳмедовнинг лақаби) муносиб тарзда уддаламоқда. Биринчи босқичнинг сўнгги турида Аҳмедов 8 та тўп киритди.

Илҳом Ражабов (“Бунёдкор”)
Ўтган йилги мавсумни “Пахтакор”да ўтказган ва клуб тўпурари бўлган Илҳом Ражабов бу йил “Бунёдкор”да сермаҳсуллик кўрсатмоқда. Илҳом олдинги 3 турда 9та тўп киритган эди, бу сафар эса ана шу 9 тўпни бир турда рақиблар дарвозасига жойлаб қўйди.

Элдор Ҳошимов (“Ардус”)
“Ардус”нинг иккинчи тўртлигида майдонга тушадиган Элдор Ҳошимов бу турда 7 та голга муаллифлик қилди. Ўйин жиҳатидан ҳам у ўсиб бораётганини кўрсатди. Асосий вазифаси ҳимояга жавоб бериш бўлган футзалчи учун бир турда еттита гол жуда яхши натижа.