Файзулла Қамбаров: "Омадимиз келмаса, юлдузли таркиб билан ҳам айтарли натижага эришиш қийин"

Шиддатли ва мурорасиз кечган учрашувда майдон эгалари 2:1 ҳисобида ғалаба қозонди. Бу ўйинга қадар клуб иштирокида асосан дуранг натижалар қайд этилаётганди. Хўш, “Қизилқум” мавсумни қайси ўринларда тугатиш учун курашмоқда? Бунга жавоб олиш мақсадида клубнинг етакчи футболчиси Файзулла Қамбаров билан суҳбатлашдик.

- Суперлига доирасида охирги маротаба Бекободда кечган баҳсда ғалаба қозонгандик, - дея гап бошлади Қамбаров. Ғалабамизни мухлисларимиз анча кутиб қолишди. Кетма-кет дуранг натижалардан зерикканди. “Турон” устидан қозонилган ғалабадан сўнг футболчилар ва мухлисларимизнинг ҳам кайфиятлари ҳаминқадар кўтарилди. “Турон” билан баҳс анча қийин кечди. Ҳар ҳолда улар Суперлигада қолиш учун курашмоқда.

Кетма-кет дуранг натижалар ҳақида
- Дарҳақиқат, бу мавсумда энг кўп дуранг ўйнаган жамоа бўлиб турибмиз. Менимча, кўп дуранг қайд этилаётганига ўйинларда омадимиз келмаётгани билан боғлиқ деб ўйлайман.

Совринли ўринлар учун кураш тўғрисида
- Биз ҳалигача бу мақсадимиз йўлида қайтганимиз йўқ. Мавсум бошида юқори ўринларнинг бирини қўлга киритиш учун курашга қўшилгандик. Афсуски, керагидан ортиқ очколарни қўлдан чиқарганимиз туфайли очколаримиз сонида пасайиш кузатилди. Иккинчи даврада кўплаб ўйинларда дуранг ўйнадик. Лекин олдимизда турган баҳсларда ижолбий натижалар кўрсата олсак бўлади. Ҳали имконият тўлиқ қўлдан бой берилгани йўқ.

Таркиб борасида
- Чиндан ҳам бу мавсумда таркибимиз анча кучайтирилди. Энг маҳоратли футболчилар жалб қилинди. Бу йигитлар ҳам “Қизилқум” билан совринли ўринларнинг бирини эгаллаб, келгуси мавсумда халқаро майдонда тўп тепиш имкониятига эга бўлишни ният қилган. Лекин футболда омадга кўп нарса боғлиқ. Омадимиз келмаса, юлдузли таркиб билан ҳам айтарли натижага эришиш қийин.

Майдондаги роли ҳақида
- Ўйлашимча, ҳеч бир футболчи мавсум давомида кўрсатган ўйинидан тўлиқ қониқиш ҳосил қилмайди. Жумладан, мен ҳам. Кўпроқ жамоага ёрдам беришни истайман.