Фарруҳ Сайфиев: “Дердийок "Пахтакор"га катта фойда келтиришига ишонаман”

Эндиликда “шерлар” ОЧЛ биринчи турига тараддудни шу ерда олиб боришади. Муҳим учрашувлар олдидан етакчи футболчи Фарруҳ Сайфиев фикрларини билдириб ўтди.

“Биринчи йиғинни Тошкентда ўтказдик. Бунда жисмоний ҳолатимизни яхшилашга урғу бердик ва тикланиш машқларини бажардик. Иккинчи йиғинни эса БААда олиб бордик. Учта ўртоқлик учрашувида майдонга тушдик. Узоқ танаффусдан кейин ўйинимизни топиб, уни йўлга қўйиб олиш муҳим эди.

Янги келган юлдуз футболчи Эрен Дердийок ҳақида ижобий фикр билдиришим мумкин. Тажрибали футболчи, жамоамизга яхшигина ёрдами тегади деб ўйлайман.

Жорий йилдаги илк расмий ўйинимизни 10 февраль куни “Шабаб Ал Аҳли” жамоасига қарши ўтказамиз. Дастлабки икки турда ўз майдонимизда ўйнаймиз. Худо хоҳласа ғалаба қозониб суюклиларимизга шодлик улашамиз. Рақибларимиз оддий жамоалар эмас. “Ал Ҳилол” мусобақанинг амалдаги ғолиби. Аввалги мавсумда ҳам гуруҳимиздан анча кучли жамоалар жой олганди. Назаримда биз муносиб кураш олиб боргандик”, - деди Фарруҳ Сайфиев.

Абдулазиз Искандаров ёзиб олди