Амир Ғалинои: "Ўзбекистон иккинчи бўлимда умуман дарвозамизга хавф сололмади. Босимимиз шунчалик кучли бўлдики, "Манчестер Сити" футболчиси майдондан четлатилди"

"Ўзбекистон билан ўйинни яхши бошламадик, лекин вақт ўтиши билан ташаббус тўлиқ бизга ўтди. Бу турнир биз учун ўсиш учун имконият эди. Кучли ва заиф томонларимизни аниқлаш ва бартараф этиш учун ўйинлар жуда муҳим. Танзания билан учрашувни ҳам ҳисобга олсак, сўнгги уч ўйинда ишончли тарзда дарвозамиз даҳлсизлигини сақладик. Бугун Ўзбекистон билан ўйин дастлабки 25 дақиқада биз учун яхши кечмади, аммо ўша пайтдан бошлаб, айниқса иккинчи бўлимда, ўйин тўлиқ назоратимизга ўтди. Кўплаб бурчак тўплари ишладик, бир нечта жуда яхши вазиятлар яратдик. Бу биз учун муҳим — демак, ўсиш бор. Жароҳати бор футболчиларимиз қайтиб қўшилса, жамоанинг даражаси янада ошади. Умуман олганда, футболчиларимни табриклайман — турнир давомида жуда яхши ўйнашди ва меҳнат қилишди. Тўпни яхши айлантирдик, майдонда масофаларни тўғри қисқартирдик. 90 дақиқада ҳам ғалаба қозонишимиз мумкин эди, фақат вазиятлардан фойдаланмадик. Бу ўйинларда натижа эмас, ривожланиш муҳим. Ҳимоя тизимимизда ҳам, вазият яратишда ҳам жуда яхши эдик.

Мажид Ҳоссейни майдонга тушгандан кейин ҳимоя қандай ўзгарганини кўрдик. Энди тасаввур қилинг, Сардор Азмун, Меҳди Гайеди, Али Қолизода ва ҳатто Жаҳонбахш ҳам сафга қайтса, жамоанинг даражаси қанчалик ўсади. Биз ўз мақсадларимизга эришдик. Адолат билан баҳолаган одам Эроннинг бу турнирдаги ўйинини мақтайди. Ўзбекистон Мисрга қарши жуда фаол ўйнаган эди, лекин бизга қарши ундай бўлмади. 25-дақиқадан бошлаб жамоавий интизомимиз жуда юқори бўлди. Бундай ўйинлар бизга камчилик ва афзалликларимизни аниқ кўрсатиб беради. Мен жамоадан жуда мамнунман ва футболчиларга раҳмат айтаман. Ўзбекистон иккинчи бўлимда умуман дарвозамизга хавф сололмади. Биз 8 та бурчак тўпи ишладик, рақиб эса бор-йўғи 1 та. Тўп назорати 60/40 га бизнинг фойдамизга бўлди. Бу ҳимояда ҳам, ҳужумда ҳам яхши ишлаганимизни кўрсатади. Фақат гол уриш керак эди. Ўзбекистон кучли жамоа, лекин иккинчи бўлимда 11 киши бўлишига қарамай, умуман дарвозамиз томон кела олмади.

Рақиб ҳимоячиси футболчимиз босими остида майдондан четлатилди. Олдинги ўйинимизда Ария Юсуфий оддий хатолик билан марказда қизил олган эди, бу сафар эса босимимиз шунчалик кучли бўлдики, "Манчестер Сити" футболчиси майдондан четлатилди. Бу — ҳужум ва ҳимоядаги ўсишнинг яққол белгиси. Бугунги ўйинда Кабо-Вердега қарши ўйинга нисбатан ҳужумимиз тезроқ, тўп айлантиришимиз эса шиддатлироқ бўлди. Аммо бундан ҳам яхшироқ бўлиши учун жароҳат олган футболчилар сафга қайтиши шарт. Ўзбекистон билан ўйиндан жуда мамнунман. Ҳужумда ҳам, ҳимояда ҳам жуда яхши белгилар кўрсатдик. Пенальтида ютиш ёки ютқазиш эса унчалик муҳим эмас", -дейди Амир Ғалинои