Элдор Салоҳнинг натижасини янгилайдими?
06 aug 2021 15:29
News

Элдор Салоҳнинг натижасини янгилайдими?

Championat.asia'да "ПиппоГол" блогига старт берилди.

Биз учун Мессининг кетишидан Шомуродовнинг Римга кўчгани муҳимроқ. Шу туфайли мазкур трансферга атрофлича тўхталишга қарор қилдик.

"Женоа" тарихига кирди

"Рома" 3 август куни ўзбекистонлик форварднинг трансферини эълон қилди. "Бўрилар" ҳамюртимизнинг трансфер ҳуқуқини 17,5 млн еврога харид қилди. Эътиборли жиҳати шундаки, Элдор бу орқали Генуя клуби тарихидаги энг қиммат сотувлар ўнлигидан ўрин олди. Тўлиқ рўйхат билан қуйида танишинг.

	исм	йил	клуб	нарх
1	Кшиштоф Пионтек	2019	"Милан"	35 млн евро
2	Диего Милито	2009	"Интер"	28 млн евро
3	Кристиан Ромеро	2019	"Ювентус"	26 млн евро
4	Пьетро Пеллегри	2017	"Монако"	20,9 млн евро
5	Стефан Эл-Шаарави	2011	"Милан"	20,3 млн евро
6	Диего Лаксалт	2018	"Милан"	19 млн евро
7	Ленардо Паволетти	2016	"Наполи"	18 млн евро
8	Николо Ровелла	2020	"Ювентус"	18 млн евро
9	Элдор Шомуродов	2021	"Рома"	17,5 млн евро
10	Жованни Симеоне	2017	"Фиорентина"	17 млн евро

Салоҳдан қимматроқ...

Юқорида Шомуродовнинг трансфери "Рома" учун 17,5 млн еврога тушгани ҳақида айтдик. Маълумот учун, бу кўрсаткич Рим клубининг энг қиммат харидлари рўйхатида 20-ўринга жойлашди.

"Рома" трансферлар ойнасида ўта тежамкор клублардан ҳисобланади. Шу туфайли тажрибали юлдузлар ёки юқори салоҳиятли вундеркиндларни ҳар доим кичик маблағлар эвазига ўз сафига қўшиб олган. Қуйидда "бўрилар" раҳбарияти учун Элдордан арзонроққа тушган машҳур ўйинчилар рўйхати билан танишинг (сўнгги 7 йил инобатга олинган).

1. Муҳаммад Салоҳ (15 млн евро)
2. Крис Смоллинг (15 млн евро)
3. Ража Наинголан (15 млн евро)
4. Стефан Эл-Шаарави (13 млн евро)
5. Эдин Жеко (11 млн евро)
6. Алиссон (8 млн евро)

7 млн евроли форвард

Трансфермаркт портали айни пайтда ҳамюртимизнинг трансфер қийматини 7 млн еврога баҳолаяпти. "Рома" марказий ҳужумчилари орасида Элдордан қимматроқ фақат 1 киши бор — "Реал" "катерано"си Борха Майораль (14 млн евро).

"Рома" — зўр "трамплин"

"Бўрилар" сафидаги энг қиммат футболчилар эса Николо Заниоло ҳамда Лоренцо Пеллегрини ҳисобланади (40 млн евро). Мазкур ўйинчиларнинг Римга кўчган вақтига эътибор қаратамиз.

Заниоло 2018 йилнинг ёзида "Интер"дан 4,5 млн еврога харид қилинган. Ўша вақтда унинг трансфер қиймати 1 млн еврога баробар эди. "Рома"да ўтказилган 2 йилдан кейин Николонинг қиймати роппа-роса 55 марта ўсган эди.

Пеллегрини эса 2017 йилда "Сассуоло"дан 10 млн евро эвазига харид қилинди. 4 йилда унинг трансфер баҳоси 4 марта қимматлашди.

Шундай экан, Элдор "бўрилар" таркибида муваффақиятли мавсум ўтказса, келаси ёзда 30 млндан арзон бўлмайди.

Салоҳ — яхши ўрнак

Мисрлик футболчи "Рома" таркибига келиб қўшилганда (2015) трансфер баҳоси 18 млн еврога тенг эди. 3 йилдан кейин бу кўрсаткич 150 млн еврога кўтарилди.

"Челси"да жой топилмаган футболчи айнан Римдаги ўйинлари орқали Юрген Клоппнинг назарига тушди. "Ливерпуль"га ўтиб, дунёнинг энг яхши футболчиларидан бирига айланди. Айни пайтда Элдор учун Салоҳдан яхшироқ ўрнак топилмаса керак. Мисрлик форвард "Рома" либосида 83 учрашув ўтказиб, 34 та гол урганди. Нима деб ўйлайсиз, Шомуродов бу натижани янгилай оладими?