Достонбек Тўхтабоев: “Машъал”ни ҳозирги ҳолатда ташлаб кета олмайман”

Эндиликда “газчилар” Про-лиганинг янги мавсуми учун тайёргарлик кўрмоқда. Хўш, жамоа дарвозабони Достонбек Тўхтабоев янги мавсумни қаерда ўтказади? Буни футболчи билан бўлган суҳбатда билиб оламиз.

“Янги мавсумни “Машъал”да бошлашим аниқ. Худо хоҳласа, биз янги мавсумга яхши тайёргарлик кўрмоқчимиз. Чунки бизни қийин йил кутмоқда. Мавсум якунига етганидан сўнг менга бир нечта жамоалардан жиддий таклиф бўлди. Бироқ мен барчасини рад этдим. Негаки, “газчилар”ни қийин ҳолатда ташлаб кетишим тўғри эмасди. Шу ерда ўйнаб, ўсишга эришдим ва фаолиятимнининг яхши дамларини ўтказмоқдаман. Қисқаси, “Машъал”да қолиш тўғри қарор.

“Машъал” билан шартномам муддати 2022 йилнинг охиригача қадар мўжалланган. Янги бошланадиган мавсумда Про-лигада муҳим ғалабаларни қўлга киритган ҳолда Суперлигага қайтмоқчимиз. Шу орқали мубораклик мухлисларни хурсанд қилган бўлардик. “Машъал” Ўзбекистоннинг энг яхши жамоаларидан бири ҳисобланади. Шундай жамоани қуйи лигада бўлиши яхши эмас. Мухлисларимиз ҳам бизни тезроқ Суперлигага қайтишимизни исташади”, - дея сўзини якунлади Тўхтабоев.