Де Хеанинг "Манчестер Юнайтед"даги келажаги ЖЧ вақтида ҳал бўлади

Нидерландиялик мураббийга кўра, Қатарда бўлиб ўтадиган Жаҳон чемпионатида юзага келадиган танаффус пайтида испаниялик посбоннинг келажагига ойдинлик киритилади. Де Хеанинг "қизил иблислар" билан амалдаги келишуви ушбу мавсум охирида якун топади. 

Клуб мазкур шартномани яна бир йилга чўзиш имконига эга. Дарвозабон якшанба куни "Вест Хэм"га қарши кечган учрашувда (1:0) муҳим роль ўйнади ва иккинчи таймда учта сейв намойиш этди. Унинг узоқ муддатли келажаги борасида тахминларга қарамай, тен Хаг испанияликнинг таркибда эканлигидан мамнун эканини билдирди:

"Ҳозир биз бўлажак ўйинлар ҳақида ўйлаяпмиз. Олдинда бизни Жаҳон чемпионати ва танаффус кутиб турибди. Ана ўшанда шартнома борасида бир қарорга келамиз.

Мен кўп бор айтганман, Давид ажойиб дарвозабон. У эндигина 31 ёшда, яхши спорт формасида ва янада кучайиши мумкин. Умид қиламанки, де Хеа сафимизда қолади", – деди "Манчестер Юнайтед" устози.