"Бухоро" клубининг номи ўзгарди

Клубнинг номи "Нурафшон" профессионал футбол клубига ўзгартирилди.

Шуни алоҳида таъкидлаш жоизки, жамоа бу "Нурафшон" номи билан ўз тарихидаги энг юқори натижалар ҳамда ёрқин ва чиройли футбол намойиш эта олган клуб мухлисларининг хурсандчиликларига сабаб бўлди десак муболаға бўлмайди. Зеро бу ўзгаришни "Нурафшон"нинг жонкуяр мухлислари анчадан бери кутишар эди. 

Шунингдек, кун давомида Бухоро марказий ўйингоҳида “Нурафшон” профессионал футбол клуби ташаббуси ва Бухоро футбол ассоциацияси билан ҳамкорликда кенгайтирилган йиғилиш ташкил этилди. Йиғилишда “Нурафшон” профессионал футбол клуби бош директори Фарруҳ Жамолович Хамраев, жамоанинг бош мураббийи Усмон Қудратович Тошев ҳамда вилоятда футбол бўйича мураббийлик фаолиятини  юритаётган мутахассислар ва ОАВ вакиллари иштирок этишди. Учрашувдан асосий мақсад Бухоро футбол мактабини қайта тиклаш, замонавий методикаларга асосланган малака оширувчи машғулотларни кучайтириш, “Нурафшон” ПФКнинг футболчиларига муносиб ўринбосарларни тарбиялаш, шунинг билан бир қаторда клуб қошида 14-16-18 ёшдаги ёшлар жамоаларини шакллантириш борасида таклифлар муҳокама қилинди. 

Учрашувда яқиндагина “Нурафшон” ПФК бош мураббийи этиб тайинланган Усмон Қудратович Тошев сўзга чиқиб эндиликда мураббийлар бирлашиб, биргаликда Бухоро футболининг равнақини ошириш кераклигини, ўз ишига фидойи бўлган мураббийларни қўллаб-қувватлаш ва рағбатлантиришга алоҳида эътибор берилиши режалаштирилаётганини таъкидлаб ўтди. 

Учрашув якунида иштирокчиларни қизиқтирган саволларга мутасаддилар томонидан жавоблар берилди.

Йиғилишдан сўнг иштирокчиларидан бири, ёшлар  мураббийси Сулаймон Рахматовни сўзга тортганимизда у:

"Ушбу учрашувни биз кўпдан бери кутган эдик. Бугун кўтарилган масалалар албатта, футболнинг ривожи учун. Биз мураббийларга билдирилаётган ишонч ва берилаётган имкониятларнинг натижаси фақат Бухоронинг номдор, легионер футболчиларини кашф қилиш бўлиши керак деб ўйлайман. Вилоятимиздаги миллионлар ўйини учун барчамиз масъулмиз. Буёғига барчамиз бир бўлиб бамаслаҳат иш тутсак ва ҳаракат қилсак, билингки Бухоронинг афсонавий футбол услубини қайтарамиз", – дея таъкидлади.

Биз эса "Нурафшон"нинг фидойи мухлислари номидан  жамоага нафақат ўтмишдаги шонли натижаларини, балки унданда юксак марралар ва зафарларни тилаб қоламиз.

Мақола Championat.asia Бухоро вилояти мухбири ва "Нурафшон” ПФК медиа маркази ҳамкорлигида Ғафур Турсунов ва Жамшид Ҳожиев томонидан тайёрланди.