"Бунёдкор"нинг янги футболчилари қайси рақамларда ўйнайди?

Тадбир давомида клуб раҳбарияти Баҳодир Насимов, Шаҳзодбек Нурматов, Александр Алемпиевич, Жавлон Мирабдуллаев, Санжар Қодирқулов ва Дилшодбек Аҳмадалиев каби янги футболчиларни оммага таништирди.

Охирги йилларни "Андижон" ва "Металлург" клубида ўтказган ҳимоячи Жавлон Мирабдуллаев "Бунёдкор"да 15-рақамда ўйнайди. Ушбу ҳимоячи 2014 йилда Мексикада ўтган ўсмирлар ўртасидаги Жаҳон чемпионати иштирокчиси ҳисобланади.

"Металлург" клубидан трансфер қилинган ҳужумчи Шаҳзодбек Нурматов "қалдирғочлар" сафида 11-рақамда тўп тепади. Нурматов миллий терма жамоада 3та ўйин ўтказган.

Баҳодир Насимов Самарқанднинг "Динамо", Россиянинг "Рубин", Озарбойжоннинг "Нефтчи" ва Эроннинг "Падидеҳ" клубида фаолият олиб борган. Миллий терма жамоа сафида 20та ўйинда майдонга тушиб 5та гол урган. Насимов "Бунёдкор"да 14-рақамни олди.

Сербиялик ярим ҳимоячи Александр Алемпиевич фаолияти давомида Сербия, Венгрия клубларида тўп тепган. 2014 йил "Олмалиқ" сафида ўйнаб ўзбекистонлик мухлисларга танилган. Ўтган мавсумни "Младост" клубида ўтказган. Алемпиевич "Бунёдкор"да 71-рақам остида ўйнайди.

Ярим ҳимоячи Санжар Қодирқулов ва ҳимоячи Дилшод Аҳмадалиев ўтган мавсумни "Обод"да ижарада ўтказганди. Иккала футболчи ҳам "Бунёдкор" клуби тарбияланувчилари ҳисобланади. Қодирқулов 26, Аҳмадалиев эса 16-рақамларни танлади.

Нарзулла Сайдуллаев