"Бунёдкор" клуби Ғиёсов қайтганини, Абдураимов ва Муртозаев кетганини расман тасдиқлади

Мавсумнинг иккинчи қисмини янада ишончли ўтказишни мақсад қилган жамоамиз илк трансферни амалга оширди. Ўтган мавсумни «Бунёдкор»да ўтказиб, ишончли ўйинлари ва голлари билан жамоамизнинг муваффақиятига улкан ҳисса қўшган Хуршид Ғиёсов яна сафимизда. Йил аввалида Жанубий Кореянинг «Анянг» клуби билан шартнома имзолаб, мавсумнинг биринчи қисмини легионер сифатида ўтказган ярим ҳимоячи яна «қалдирғоч»га айланди. Футболчи билан бир йилга мўлжалланган шартнома имзоланди.

Шунингдек, мавсум бошида ижара асосида «Насаф»дан жамоамиз сафига келиб қўшилган Ҳумоюн Муртазоев ва Сардор Абдураимов билан ўзаро келишувга кўра хайрлашдик. «Бунёдкор» футбол клуби ҳар иккала ўйинчининг кейинги фаолиятига омад тилаб қолади. Маълум бўлишича, ҳар иккала футболчи ҳам фаолиятини яна «Насаф»да давом эттиради, - деб ёзади «Бунёдкор» расмий сайти.