Бундеслига. "Бавария" илк ўйинда мухлисларга голлар-шоусини тақдим этди

Учрашув бошланиши олдидан Германияда ўтган йилнинг энг яхши футболчиси деб топилган Жером Боатенг ўзига аталган совринни қабул қилиб олди.

Жером Боатенг жароҳати боис ушбу беллашувда иштирок этолмади.

Шундан сўнг очилиш ўйин бўлгани учун кўнгил очар дастурлар бўлиб ўтди.

Ўйинга келадиган бўлсак, учрашув кутилганидек "Бавария"нинг катта устунлиги бошланди.
Беллашувнинг 9-дақиқасида Хаби Алонсо жарима майдончаси ташқарисидан ажойиб зарба йўллади ва Бундеслиганинг 54-мавсумидаги илк голни жуда чиройли тарзда киритди.

Голдан руҳланган "Бавария" олдинга интилди. Иккинчи гол ҳам кўп куттириб қўймади. Франк Риберининг майдон марказидан очилиб бораётган Роберт Левандовскига узатган заргарона узтмасини польшалик ҳужумчи самарали якунлади.

Виктор Скрипник бошчилигидаги "Вердер" "Альянц Арена"да "Бавария"га умуман қаршилик кўрсата олмади. Бременликлар сафида дарвозада турган Видвальд бир неча маротаба жамоасини муқаррар голлардан сақлаб қолди. Акс ҳолда Левандовски танаффусга покер қайд этган ҳолда йўл оларди.

"Бавария" сафида ярим ҳимоя марказида ҳаракат қилган "учлик" Видаль-Алонсо-Алькантара ажойиб ўйнашди.

"Бавария" ҳимоя чизиғида ҳаракат қилган Лам ва Алаба асосан ҳужумда жамоадошларига кўмаклашишган бўлса, Хуммельс ва Мартинесга рақиб футболчилари етарлича хавф туғдира олишмади. Нойер эса учрашувнинг катта қисмини томошабин сифатида кузатди, десак муболаға бўлмайди.

Иккинчи бўлим яна "Бавария"нинг ҳужумлар остида бошланди. Алькантара шу куни "тозаловчи" ролида анча фаол ўйнади ва учинчи голда айнан Тьягонинг хизмати катта бўлди. Алькантара майдон маркази олдида рақибдан тўпни олиб қўйди ва Алонсо Мюллерни ўнг қанотдан ҳужумга чорлади. Томас эса жарима майдончасида турган шериги Роберт Левандовскини аниқ кўра олди ва тўпни Левандовскига оширди. Роберт эса биринчи бўлимда бир қатор вазиятларда иккинчи голни киритишда қийинчиликка дуч келган бўлса, бу сафар осонгина дарвозани нишонга олди ва ҳисобни йирик кўринишга келтирди - 3:0.

"Бавария"нинг тўртинчи голига жамоа сардори Филип Лам муаллифлик қилди. Томас Мюллер билан ажойиб комбинация ташкил қилган Лам Томасдан қабул қилиб олган тўпни кучли зарба билан дарвозанинг узоқ бурчагига йўналтирди ва чиройли гол билан ҳисобни янада йириклаштирди - 4:0.

Бешинчи голни эса Франк Рибери яна ўша тиниб-тинчимас Томас Мюллернинг тўп узатмасидан сўнг киритди ва таблодаги ҳисобни чиройли кўринишга келтирди - 5:0.

Баҳсдаги охирги гол Роберт Левандовски ҳисобига ёзилди. Захирадан майдонга тушган Рафиньяга қарши жарима майдончаси ичида қоида бузилди. Ҳакам эса иккиланмай 11-метрлик нуқтани кўрсатди. Пенальтидан эса Роберт Левандовски учрашувдаги ўз хет-тригини расмийлаштирди ва ўйинга нуқта қўйди - 6:0.

Карло Анчелотти Бундеслигадаги дебют баҳсини ҳақиқий байрамга айлантириб юборди ва мюнхенлик мухлисларга очилиш ўйинида чиройли ғалабани тақдим этди.

Факт: Роберт Левандовски чемпионатдаги биринчи ўйинда хет-трик қайд этди.

Факт: Томас Мюллер "Вердер"га қарши учрашувда учта голли узатмани амалга оширди.

Факт: "Вердер" сўнгги марта Германия жаҳон чемпиони бўлишдан олдин "Бавария" дарвозасини ишғол этганди.

Шуни қайд этиб ўтиш лозимки, "Вердер" мухлислари ўйин бошланишидан олдиноқ жамоа бош мураббийи Виктор Скрипникни истеъфога чишини талаб қилишганди.

"Вердер" "Бавария"га қарши баҳс олдидан Германия кубогининг дастлабки раундида қуйи лига вакилидан мағлубиятга учраб турнирни эрта тарк этганди.

Бундеслиганинг 1-туридан ўрин олган қолган ўйинлар эртага давом эттирилади.



Бундеслига, 1-тур. Турнир жадвали.

Бавария – Вердер 6:0 (2:0, 4:0)

«Альянц-Арена»

Голлар: 1:0 – 9 Хаби Алонсо, 2:0 – 13 Левандовски, 3:0 – 46 Левандовски, 4:0 – 66 Лам, 5:0 – 73 Рибери, 6:0 – 77, пенальти Левандовски.

Бавария – Нойер, Лам (Рафинья, 74), Мартинес, Хуммельс, Алаба (Бернат, 78), Алькантара, Хаби Алонсо (Киммих, 64), Видаль, Мюллер, Левандовски, Рибери.

Вердер – Видвальд, Гебре Селасси, Сане, Дианье, Кальдирола, Гриллич (Эггештайн, 74), Ятабаре, Фритц, Бауэр, Бартельс (Ти, 88), Юханнссон (Штернберг, 64).

Огоҳлантириш: Штернберг (87).