Бугун футбол. "Шўртан" - "Насаф"

Ўйиндан нима кутяпмиз? "Насаф" бугун расмий жиҳатдан сафарда ўйнайди, аслида-ку Ғузор ўйингоҳи улар учун уй стадионидек бўлиб қолди. Чунки Қаршидаги марказий стадионда таъмирлаш ишлари бошланганидан бери "Насаф" уй учрашувларини Қаршидан унча узоқ бўлмаган Ғузорда ўтказиб келмоқда. Бугунги баҳсда жамоаларнинг имконияти тенг дея оламиз.

Факт: "Шўртан" ўз майдонида ўтказган еттита ўйиндан тўрттасида ғолиб чиққан. Ғузорликлар уйда "Нефтчи", "Пахтакор", "Локомотив" ва "Бунёдкор" клубларини мағлуб этишган. Гап шундаки, "Шўртан" ғалаба қозонган ўйинларда ўз дарвозасидан гол ўтказмаган. 

Биласизми? "Шўртан" охирги олтита ўйиннинг фақат биттасида ғалаба қозониб, бешта учрашувда мағлубиятга учради. Жамоа кетма-кет икки ўйиндан бери юта олмаяпти. 

Факт: "Насаф" бугун сафарда еттинчи ўйинини ўтказади. Биласизми, "Насаф" шу пайтгача сафар ўйинларида фақат бир марта ғалаба қозонган. Жамоа 1-турда "Қўқон-1912"ни мағлуб этиб қайтган. "Насаф" охирги марта Бекободга сафар уюуштириб, 0:1 ҳисобида енгилиб қайтди.