Бугун футбол. "Қўқон-1912" - "Шўртан"

Қизиқарли кечиши кутилаётган учрашувларда бири Қўқонда, "Қўқон-1912" ва "Шўртан" жамоалари ўртасида бўлиб ўтади. 

Турнир жадвалига назар солсак, "Қўқон-1912" 34 очко билан 7-ўринни, "Шўртан" эса 20 очко билан 14-ўринни банд этиб турибди. Қўқонликлар ҳатто иккинчи ўринга ҳам кўтарилиб олишганди, аммо иккинчи даврадаги тўрт мағлубият жамоани пастга тушириб юборди. Хусусан жамоа кетма-кет охирги иккита баҳсни ютқазди. 

"Шўртан" ҳақида гап кетганда бу жамоа сафарда ҳали ғалаба қозонгани йўқ. Фақат бир марта дуранг ўйнаган бўлса, қолган 9та баҳсда ютқазиб қўйган. Қолаверса, "Шўртан" сафар ўйинларида атиги учта гол урган. 

Биласизми? "Шўртан" сафардаги бир очкосини 16-турда "Нефтчи"га қарши учрашувда қўлга киритган. Жамоа Фарғонада 1:1 ўйнаган. Қолаверса, ғузорликлар иккинчи давра бошланганидан бери ҳозирча фақат битта ўйинда ғалаба эришишди. 

Факт: "Қўқон-1912" уйдаги беллашувларда 20та гол урган ва бу борада "Насаф" билан бир хил кўрсаткичга эга.