Бранко Иванкович кечаги саволни эслади ва ҳакамликдан очиқчасига норози бўлди - матбуот анжумани

Бранко Иванкович: - Кеча эронлик журналист ҳакамларнинг эҳтимолий хатоларидан қўрқмайсизми деб сўраганди. Мен эса буни шунчаки футболдаги ҳолат сифатида баҳолагандим. Бугун эса айнан ҳакамликдан кўнглим тўлмади. Бунга қадар ОЧЛда 4 ўйин ўтказдик. Биринчи баҳс айнан "Пахтакор" билан бўлганди. Ўшанда "Пахтакор" жамоамизга яққол оффсайддан гол урганди. Ҳакам эса ҳисоблаган. "Ал Садд" билан ўйинда ҳам яна оффсайддан гол уришди ва бу ҳисобланди. Бугун ҳам жамоамиз фойдасига берилиши керак бўлган яққол пенальти белгиланмади. "Пахтакор"га қарши ўйинда гол уриш учун 20-25 вазият яратишнинг иложи йўқ. Ҳар иккала жамоа бугун яхши ўйнади ва кескин ҳаракат қилди. Лекин ҳакамлар рақибнинг асосий футболчисига айланди.

Одатда мен ҳакамлар ишини муҳокама қилмайман. Лекин бугунги ҳакамлик менга ёқмади. Бу ҳақиқат. Ўтган йили ҳам, жорий мавсумда ҳам ОЧЛда бизга қарши ҳакамлик жуда ёмон ҳолатда бўлмоқда. Айнан ҳакамларни деб биз камида 4 очкодан маҳрум бўлдик. "Персеполис"ни Осиёда ҳакамлик бузиб ташламоқда. Ўтган йили Японияда ҳам бизга қарши шундай ҳолат юзага келганди.

"Пахтакор" осон рақиб эмас. Уларга қарши кўплаб вазиятлар яратишнинг имкони йўқ. Жамоа яхши ҳимояланди, қўшимчасига дарвозабон "Пахтакор"ни голлардан қутқарди. Бугун айнан у жамоанинг қаҳрамонига айланди.

Жисмоний ҳолат? Тўғри, ҳар 4-5 кунда футбол ўйнаш оғир. Лекин мен муваффақиятсизликка буни сабаб сифатида кўрсатмаган бўлардим. Бугун ҳам яхши ўйнадик аслида.

"Ал Садд" мусобақа фаворити. Улар жуда кучли жамоа. Менимча, "Ал Садд" билан биргаликда "Пахтакор" жамоаси плей-офф босқичига йўл олишади.