Биринчи лига. “ЎзДонгЖу” – бу қандай жамоа?

Бугун эса жорий мавсум биринчи лигада иштирок этиши маълум бўлган Андижоннинг “ЎзДонгЖу” жамоасига батафсил тўхталиб ўтишга қарор қилдик.

ЁШЛАРГА ЭЪТИБОР ҚАРАТАДИГАН ЖАМОА

Жамоанинг бу йил биринчи лигада иштирок этиши аниқ бўлгач, сайтимиз ўқувчилари томонидан бу клуб ҳақида етарлича тушунчага эга бўлмаганини умуман олганда, “ЎзДонгЖу” ҳақида тушунча йўқлигини билиб олиш қийин эмас. Чунки жамоа ҳақидаги хабарлар остида ёзилаётган фикрларнинг аксарияти “Бу қаерни ва қандай клуб” қабилидаги саволлар бўлиб чиқмоқда. Шу боис аввало “ЎзДонгЖу” хусусида тўхталиб ўтсак. Айтишларича жамоанинг ташкил топганига 10 йилдан ошган. Андижондаги лак бўёқ ишлаб чиқариш корхонаси ишчи ходимлари эвазига тузилган жамоа бир неча йиллар давомида вилоят иккинчи лига турнирида иштирок этган. Шунингдек пулька баҳсларида ҳам қатнашган. Клуб янги ташкил топган кезларда футболчиларни маҳаллий мураббий Виталий Легай шуғуллантирган. Кейинчалик жамоа тобора профессионаллашиб, ўз олдига юқори мақсадларни қўя бошлаган.

ОЛИЙ ЛИГАДАГИ БИР ЙИЛЛИК ПАРВОЗ

2006 йилга қадар жамоага устозлик қилган Легай ўрнига кейинчалик таниқли мураббий Ислом Аҳмедов олиб келинди. 2007 йили биринчи лигада қатнашган “ЎзДонгЖу” сафида Қобил Олимжонов, Ҳусниддин Тоштемиров, Маъруф Тўрақулов, Қаҳрамон Абдуқодиров, Расул Раҳмонов, Азиз Маҳмудов, Отабек Қиличев, Элёр Раҳматуллаев, Ислом Аҳмедов каби маҳаллий футболчилар ўйнаган. 2008 йили эса жамоа олий лигада иштирок этганини кўпчилик мухлислар яхши эслашса керак. Мазкур йили Ислом Аҳмедов асосан 20-23 ёшли футболчилардан иборат курашчан жамоа шакллантира олганди. У пайтда ҳаттоки жамоанинг деярли 80 фоиз футболчиси олий лигада унгача ўйнаманганлар эди. Лекин шунга қарамай Аҳмедов бир нечта ёшларни кашф этган холда, курашчан жамоа туза олганди. Чемпионатнинг биринчи туридаёқ сафарда “Сўғдиёна”дан бир очко тортиб олган жамоа 2-турда ўз майдонида “Пахтакор”га жиддий қаршилик кўрсата олганди. Лекин тажриба борасида рақибидан анча паст даражада бўлган андижонликлар Зайниддин Тожиевнингг ягона голи эвазига мағлубиятга учраганди. Шундай бўлишига қарамай стадионга келган мухлислар футболчиларнинг интилишларидан хурсанд бўлиб, бутун трибуна уларни қизғин қўллаб-қувватлаганди. Юқорида айтиб ўтганимиздек, 2008 йили “ЎзДонгЖу” олий лигада анчагина ёшарган таркиб билан кириб келганди. Воҳид Шодиев (“Бунёдкор”), Расул Раҳмонов (“Андижон”), Мирзоҳид Ғофуров (“Машъал”), Вадим Любинский каби ўйинчилар ўша пайтда жамоа етакчилари бўлишганди. Бош мураббий Ислом Аҳмедовнинг биринчи даврада асосан ёшларга имконият бергани охир оқибат қимматга тушганди. Чунки жамоа танаффусга турнир жадвалининг энг сўнгги поғонасида чиқиб кетганди. Табиийки бундан қониқмаган раҳбарият Аҳмедовга яна ишонч билдиришни истамади ва ёзги трансфер ойнасида бошқарув постига таниқли мураббий Баҳром Ҳакимовни олиб келишни лозим топган. Таркибни Андрей Бакланов, Рустам Ҳакимов, Рустам Аъзамов, Иброҳим Раҳимов, Тўлқин Мирзаев ҳамда Константин Канин каби олий лига ҳавосидан баҳраманд бўлган ўзининг ишонган шогирдлари ҳисобига кучайтирган Ҳакимов ҳам барибир вазиятни ижобий томонга ўзгартира олмаганди. Иккинчи давранинг дастлабки ўйинида ўз майдонида “Бухоро”га йирик ҳисобда мағлубиятга учраганидан сўнг Баҳром Ҳакимов соғлиги билан боғлиқ муаммо юзага келганини рўкач қилиб, жамоага бошқа қайтиб келмаганди. Бош мураббийнинг ишини ёрдамчиси Зоҳид Нурматов давом эттирган. Аммо кейинчалик “ЎзДонгЖу” мавсумни маҳаллий мураббий Абдурашид Исмоилов бошчилигида якунлаган. Бир йилнинг ўзидаёқ элитани тарк этган жамоа шундан сўнг биринчи лигада ҳам иштирок этмай келаётганди.

АСОСИЙ ЭЪТИБОР ЁШЛАРНИ ЮЗАГА ЧИҚАРИШ

“ЎзДонгЖу” биринчи лигада иштирок этмай келаётган бўлсада, жамоа бунга қадар вилоятда “Ўзавтосаноат”лигасида қатнашди. Жорий йилдан эса яна биринчи лигада ўйнайдиган бўлди. Клубнинг фалсафаси маҳаллий иқтидорли ёшларни юзага чиқариш. Андижон шаҳридаги “Футболга ихтисослаштирилган мактаб-интернати”дан етишиб чиқаётган ёшларни катта футболга кириб келишида ўзига хос “трамплин” вазифасини ўтаб беришдир. Шу боисдан ҳам жамоанинг бу йилги ўртача ёши 22-23 бўлади. Жамоадаги энг катта футболчи бу дарвозабон Бекзод Турғунов, 28 ёш. Энг ёши эса 1998 йилдаги бир қатор футболчилардир. Шунингдек таркибдаги футболчиларнинг деярли барчаси андижонликлар эканлигини айтиб ўтиш даркор. Жамоанинг шу кунгача ўтказган ўйинларидан келиб чиқиб айтиш мумкинки, Шаҳбоз Жумабоев, Дамир Жамолиддинов, Акмал Йўлдошев, Суҳроб Нўъмонов ҳамда Азиз Қаюмовни етакчилар деб аташ мумкин. Қолган ўйинчилар бир хил савиядаги ёшлардир. Клуб спорт директори Азизбек Сулаймоновнинг айтишича жамоанинг мақсади вилоятнинг бош жамоаси “Андижон”га ва шунингдек турли ёшдаги мамлакат терма жамоаларига иқтидорли ёшларни етказиб беришдан иборат.

МУРАББИЙЛАР ШТАБИДА КИМЛАР ИШЛАМОҚДА?

Жамоа билан яқиндан танишиш мақсадида клуб спорт директори Азизбек Сулаймонов билан суҳбатлашганимизда қуйидагиларни таъкидлади. – Жамоамизни бу йил чемпионатда иштирок этиши номаълум турганди. ПФЛдан руҳсат берилгач, тайёргарликни янада кучайтирдик. Унга қадар кунига бир маҳалдан асосан “Футболга ихтисослаштирилган мактаб-интернати” тарбияланувчилари билан машғулот ўтказиб келинаётганди. Қуръа ташлаш маросимидан кейин эса бош мураббийликка бунгача “Андижон”да фаолият юритиб келган Нозим Муллаохуновни олиб келдик. Ҳозирда у кишига жисмоний тайёргарлик бўйича Фозил Бобораҳимов ёрдам бериб келмоқда. Дарвозабонлар билан эса Ҳамидулло Зокиров ишламоқда. Қолаверса машғулотларни ўтказишда “Футболга ихтисослаштирилган мактаб-интернатида” фаолият юритаётган бошқа ёш мураббийларимиз Лутфулло Мажидов, Шакир Галимов ҳам ёрдам бериши мумкин. Бизда ҳаммаси аҳил-иноқ тарзида, ҳудди бир оиладек ишлайди.

МАҚСАД КЕЙИНГИ ИККИНЧИ БОСҚИЧГА ЙЎЛ ОЛИШ

Биринчи лига жамоаларининг қай биридан бу йилги мақсади ҳақида сўраманг, энг аввало кейинги босқичга йўл олишни кўзлаётганини айтади. “ЎзДонгЖу” ҳам бундан мустасно эмас. Азизбек Сулаймоновнинг маълум қилишича, жамоанинг таркиби бу йил янгитдан ва шу билан бирга маҳаллий ёшлар ҳисобига шакллантирилмоқда. Жамоа ўз ўйин услубига эга бўлиши учун маълум бир вақт керак бўлади. Лекин шунга қарамай улар айни пайтдаги ўйинчилар билан ҳам кучли саккизликка кириш мумкинлигига ишонмоқда. – Чемпионат регламентига кўра, иккинчи босқичга чиқа олмасак, бир неча ой футболчиларимиз ўйин амалиётига эга бўлмай қолиб кетади. Шунинг учун қандай бўлмасин биринчи босқичда юқори саккизталикка кириш учун курашамиз – дейди Сулаймонов.

“АНДИЖОН” БИЛАН БИТТА ҚАРОРГОҲДА ИСТИҚОМАТ ҚИЛИНАДИ

“ЎзДонгЖу”нинг бунгача шахсий қароргоҳи йўқ эди. Жамоа олий лигада иштирок этган кезлари футболчилар шаҳардаги меҳмонхоналарнинг бирида истиқомат қилганди. Олий лига қатнашчиси бўлган “Андижон”нинг турар жой қароргоҳи “ЎзДонгЖу” Paint Қўшма қорхонаси” номига ўтказилган. Шу боис “Бўёқчилар” ҳам бу йил ушбу базада истиқомат қилади. Бинонинг 1-2-қавати “Андижон” жамоаси учун ажратилган бўлса, 3-қаватда “ЎзДонгЖу” футболчилари бўлади.

ЖАМОА РАҚИБЛАРИНИ ҚАЙСИ СТАДИОНДА ҚАБУЛ ҚИЛАДИ?

Андижон шаҳридаги “Наврўз” стадионининг майдонига илгари бошқа клуб аъзолари ҳавас билан қарардилар. Бу бор гап. Майдонинг сифати юқори эканлигидан меҳмон жамоа футболчилари ҳар гал мақтаб кетарди. Афсуски охирги йилларда бу стадионда ҳеч қандай расмий ўйинлар ўтказилмаяпти. Чунки айтишларича майдоннинг холати аввалгидек идеал холатда эмас экан. Хўш, “ЎзДонгЖу” бу йил рақибларини қайси стадионда қабул қилади?
– Ҳозирда уй ўйинларимизни Шўрбулоқ даҳасидаги сунъий майдонда ўтказишни режалаштирмоқдамиз. Бунинг учун стадионда зарур бўлган табло ўрнатилмоқда. Шунингдек бошқа жиҳатлар борасида ҳам стадион маъмурияти шуғулланмоқда. “Наврўз” стадиони ҳам “ЎзДонгЖу” Paint Қўшма қорхонаси” ҳисобига ўтказилган. Лекин унинг майдонини яхшилаш учун вақт керак бўлади. Шу сабабли ёзга қадар стадионни имкон қадар реконструкция қилишни ўйлаб турибмиз. Чунки сунъий майдонда ёз ойида ўйнаш мураккаб кечади. Келаси йилдан эса албатта “Наврўз” стадионида ўйнаймиз – дейди Азизбек Сулаймонов.

Исломбек РУСТАМБЕКОВ.