Бахтиёр Ашурматов: "Бугунги ғалаба билан мухлисларимизни табриклайман"

"Ўйин қийин бўлиши маълум эди, сабаби "Сўғдиёна" сўнгги ўйинларда кўп очко йўқотганди. Шу сабабли ҳам бор кучлари билан ўйнашлари аниқ эди. Футбол фақат ҳужумлардан иборат эмас, 90 дақиқа ҳужум қилиш мумкин эмас. Шу боис мухлисларимиздан бизни тўғри тушунишларини сўрайман. "Сўғдиёна"даги вазиятни жуда яхши биламан, Файзиев билан гаплашиб турамиз", - деб гап бошлади Ашурматов.

"Бугун биринчи бўлимда ўйинимиз қовушмади. Иккинчи бўлимда голлар уриб ғалаба қозондик. Бугунги ғалаба билан раҳбариятни, футболчиларни ва мухлисларни табриклайман".

"Мансур Саидовни ўрнига ҳужумчи тушурдим, сабаби бизга гол керак эди. Икки ҳужумчи тактикаси билан ўйнай бошладик ва голлар урдик".

"Иккита гол ўтказиб юбордикми, демак хатолар бўлди. Футбол хатосиз бўлмайди. Дарвозабон ва ҳимоячиларга танбеҳ бериш эмас уларни қўллаш керак".

"Шахбоз Эркинов ҳар бир ўйинда вазиятлар бўлаётганди, фақат гол ура олмаётганди. Бугун ниҳоят ўзининг имкониятларидан унумли фойдаланди. Ушбу ҳолат унга ижобий таъсир қилиши мумкин. Мухлислардан уни кейинги ўйинларда ҳам қўллаб туришларини сўрайман", - дейди Бахтиёр Ашурматов.