Асрор Алиқулов: "Янгиер" футболчиларига бўшлиқ ва вақт берсак, истаган ишини қилиши мумкин эди"

"Учрашув қизиқарли бўлди, десам янглишмайман. Юқори темпда бошладик, мақсадимиз ҳам шундай эди. Рақиб сафида тезлиги юқори, яхши савиядаги футболчилар жамланганди. Ўйин аввалида гол уриш учун имкониятлар бўлди. Бундай вазиятда бир оз совуққонлик етишмади. Айрим футболчилар биринчи бўлимда ўйинга киришиб кета олишмади", – дейди Асрор Алиқулов. 

- Иккинчи бўлимда захирадан майдонга тушган футболчилар ўйин назоратини қўлга олишда ёрдам беришди. Уларга бир оз эртароқ имконият берилиши мумкинмиди? 

- Биз буни кўриб чиққандик. Биринчи бўлимда кўпроқ ёш футболчилар, техник томондан кучли, кўп югурадиган, биринчи пасни берадиган ижрочилар иштирокида юқори темпда ҳаракат қилишни кўзлагандик. Рақибга босим ўтказа олсак, иккинчи бўлимда бошқача типдаги футболиларни туширишни ўйладик. Қайсидир жойда хато қилсак, рақиб фойдаланиб кетиши мумкин эди. Уларга вақт ёки бўшлиқ берсак, истаган ишини қиларди. "Янгиер" футболчиларининг имкониятини пасайтириш учун шундай ўйнадик. 

- "Янгиер" футболчилари "Шўртан" ҳимоясини ёриб киришга ҳаракат қилди ва буни уддалади ҳам. Бу уларнинг савияси билан боғлиқми?

- Ҳа, албатта. Ҳаводан келган тўпларда, яккакурашларда устун бўла олмасдик. Охирги дақиқаларда диққатли бўлишни айтдик. Узун тўпларга ярим ҳимоячилар ёрдамлашиши керак эди. Футболчиларга кийиниш хонасида ташаккур билдирдим. Уларда ўсиш бор. "Хоразм" билан янги куч ва режа билан ўйнаймиз. 

- Кейинги мавсумда "Шўртан"да қоласизми?

- "Шўртан"да ишлаш кўпроқ руҳий томондан қийин. Мавсум якунланаётганидан футболчилар қайсидир маънода хурсанд эмас. Мураббий сифатида бир оз чарчадик, десам тўғри бўлади. 

- Интервьюларингиздан бирида Ғузорда "Шўртан"нинг ғалабасидан қувонишмайди, дегандингиз. Бу кимга қарата айтилганди? 

- Бу кўпроқ қўллаб-қувватлаётган мухлислар уйда ўтиришгандир. Ўз ўйинимиз билан уларни стадионга қайтара олган бўлсак хурсандмиз.