Асрор Алиқулов: «Самарқандда дуранг қайд этиш ёмон натижа эмас»

- Асрор ака, бугун “Шўртан” бир очко қўлга киритдими ёки 2 очко йўқотдими?
- Самарқанддан бир очко олиб қайтаётганимиздан хафа эмасман. Бугун жамоамиз “Динамо”га жиддий қаршилик кўрсатиб, сафардан очко билан қайтаяпти. Бу баҳсда ҳар икки жамоа ҳам аслида фақат ғалабани кўзлаганди. Омадимиз келса, имкониятлардан фойдаланиб, ғалаба билан ҳам қайтишимиз мумкин эди. Аммо, бугунги натижа ҳам ёмон эмас. “Динамо” ғалаба учун кўп ҳаракат қилди, аммо бошқа чизиқлар каби ҳимоя ва дарвозабонимиз ҳам яхши ўйин намойиш этди. Айниқса, иккинчи бўлимда “Динамо” ҳужумкорликни ошириб, Илҳом Юнусов, Зоҳир Қўзибоев сингари тажрибали футболчилари билан гол уришга интилди, аммо якунда дуранг қайд эта олдик.

- «Андижон»га қарши ғалабали ўйиндан кейин “Шўртан” кутилмаганда Ғузорда “Норин”га мағлуб бўлди. ПФЛнинг “Шўртан”дан 3 очкони олиб ташлаш қарори жамоага жиддий таъсир қилдими?
- Афсуски, шундай. Бундай нарсалар хоҳлаймизми-йўқми футболчилар руҳиятига таъсир қилади. Ҳар ҳолда, тасаввур қилинг майдонда курашиб, ғалаба қозонсангда, сенга умуман боғлиқ бўлмаган сабаб туфайли натижанг бекор қилинса, қандай таъсир қилади? Айниқса, футболчилар тер тўкиб ишласа-ю, маблағ берилиши вақтида футболчига эмас, қаердагиларга берилса бу жуда аламли ҳолат. Бундай пайтда бизга ҳам футболчиларни, жамоани тайёрлаш, ғалаба учун курашга чорлаш осон эмас. Қолаверса, бунақа ҳолатларда мухлислар ҳам жамоани тўғри тушуниб, қўллаб-қувватлашлари лозим. Ғалаба қозонсак яхшимиз, мағлуб бўлганда эса яккаланиб қолаётгандекмиз. Клубни доимо қўллаб-қувватлаётганликларини сезиш кучимизга яна куч қўшарди.

- Кўриниб турибдики, ўйин жиҳатдан “Шўртан”да яхши потенциал бор. Жамоа олдига Суперлигага чиқиш вазифаси қўйилганми?
- Аниқ вазифа чемпионлик бўлмасада, менинг мақсадим ҳар бир ўйинда майдонга тушиб, ғалаба қозонишдир. Қўл остимдаги йигитларга ишонаман, уларда потенциал бор. Футболчилар ҳар бир ўйинда ғалаба учун борларини беришмоқда ва бундан кейин ҳам майдонга тушдикми охиригача курашишда давом этамиз.

Усмон ИБОДОВ ёзиб олди.